- २०८३ बैशाख ४ शुक्रबार
काठमाडौँ । गाजामा युद्धविरामका लागि इजरायल र हमासबीच शनिबार नयाँ वार्ता सुरु भएको छ । यी वार्ताहरू पछि, हमासले नयाँ युद्धविराम सम्झौताको एक भागको रूपमा थप इजरायली बन्धकहरूलाई रिहा गर्ने प्रस्ताव गरेको मिडिया रिपोर्टमा उल्लेख छ ।
इजरायली सेनाले गाजा पट्टीमा ठूलो नयाँ आक्रमण सुरु गरेको केही घण्टापछि दुई बीचको यो कुराकानी सुरु भएको हो । हमासले ६० दिने युद्धविराम र इजरायलले प्यालेस्टिनी कैदीहरूको रिहाइको बदलामा नौ इजरायली बन्धकहरूलाई रिहा गर्ने प्रस्ताव गरेको छ । साथै हमासले नयाँ सम्झौता अन्तर्गत हरेक दिन राहत सामग्री बोकेका ४०० ट्रकहरू गाजा प्रवेश गर्न अनुमति दिने र गाजाबाट बिरामी मानिसहरूलाई बाहिर निकाल्न पनि अनुमति मागेको छ ।
अर्कोतर्फ इजरायलले भने बाँकी रहेका सबै बन्धकहरूको जीवित रहेको प्रमाण र उनीहरूको बारेमा सबै जानकारी उपलब्ध गराउन माग गरेको छ ।
यो चरणको युद्धविराम वार्ता कतार र अमेरिकाका मध्यस्थकर्ताहरू मार्फत दोहामा भइरहेको छ । यो कुराकानी शनिबार दिउँसो सुरु भएको हो ।
इजरायलले प्रस्तावित सम्झौताको बारेमा सार्वजनिक रूपमा प्रतिक्रिया दिएको छैन, तर वार्ता अघि उसले गाजाबाट आफ्नो सेना फिर्ता नगर्ने वा युद्ध अन्त्य गर्ने कुनै वाचा नगर्ने बताएको थियो ।
