- २०८२ जेठ ५ सोमबार
काठमाडौँ । नयाँ शिक्षामन्त्री रघुजी पन्तले आन्दोलनरत शिक्षकहरुसँग गर्ने भनेको वार्ता भाँडिएको छ ।
नेपाल शिक्षक महासंघका अध्यक्ष लक्ष्मीकिशोर सुवेदीले वार्ता हुन नसकेको जानकारी दिएका छन् । मन्त्री पन्तसँग वार्ता गर्न गएको शिक्षकको टोली सिंहदरबारको गेटबाटै फर्किएको थियो ।
आजको बार्ता नहुनुमा शिक्षा मन्त्रालयले तयार गरेको बार्ता सूचीमा महांसघबाट गएका शिक्षक प्रतिनिधिहरुको नाम नहुनु रहेको पाइएको छ । मन्त्रालयले आफ्नै किसिमले शिक्षकहरुको बार्ता टोलीको नाम सार्बजनिक गरेपछि महासंघका प्रतिनिधिहरु गेटबाटै फर्किएको बुझिएको छ ।
शिक्षा मन्त्रालयले विभिन्न शिक्षकसँग सम्बन्धित संघ संस्थाका प्रतिनिधिलाई समेट्दै २५ जनाको सूची सार्बजनिक गरेको थियो ।
बार्ताका लागि तयार रहेका शिक्षा मन्त्री रघुजी पन्तले शिक्षकहरु मन्त्रालय नपुगी फर्किएको थाहा पाएपछि भने आफुहरु नेपाल शिक्षक महासङ्घले बनाएको आधिकारिक वार्ता टोलीसँग वार्ता गर्न तयार रहेको प्रतिक्रिया दिएका छन् ।
बिभिन्न माग राख्दै र विगतमा भएका सहमति कार्यान्वयनको माग गर्दै गत चैत २० देखि विभिन्न मागसहित शिक्षक महासङ्घको नेतृत्वमा देशभरका शिक्षक काठमाडौँ केन्द्रित सडक आन्दोलनमा छन्।
