इथियोपिया भयानक सडक दुर्घटना, ७१ जनाको मृत्यु

काठमाडौँ । दक्षिणी इथियोपियाको सिदामा राज्यमा एउटा भयानक सडक दुर्घटना भएको छ । यात्रुले भरिएको ट्रक नदीमा खस्दा ७१ जनाको मृत्यु भएको छ ।

दुर्घटनामा ६८ पुरुष र तीन महिलाको मृत्यु भएको सिडामा प्रहरी आयोगले जानकारी दिएको छ ।

केही यात्रु विवाह समारोहबाट फर्किरहेका थिए । एकै परिवारका धेरैको ज्यान गएको छ । दुर्घटनाको कारण ट्रक ओभरलोड भएको स्थानीय ट्राफिक प्रहरीले जनाएको छ । घटनाका बेला ट्रकमा कति यात्रु थिए भन्नेबारे अधिकारीहरूले खुलाएका छैनन् ।

इथियोपिया अफ्रिकाको दोस्रो सबैभन्दा धेरै जनसंख्या भएको देश हो । इथियोपियामा हरेक दिन सडक दुर्घटना हुने गरेको छ किनभने यहाँका सडकहरू खराब र जीर्ण छन् ।