- २०८१ बैशाख १५ शनिबार
पोखरा । राष्ट्रिय प्रजातन्त्र पार्टीका अध्यक्ष तथा उपप्रधान एवं ऊर्जा मन्त्री कमल थापाले मुलुकको आर्थिक समृद्धि र विकास लोकतान्त्रिक गठबन्धनको साझा अवधारणा भएको बताएका छन् ।
राष्ट्रिय प्रजातन्त्र पार्टी कास्कीले आज पोखराको चिप्लेढुंगास्थित मानवअधिकार चोकमा आयोजना गरेको चुनावीसभामा उनले ‘प्रजातान्त्रिक मूल्यमान्यता, संविधान र आर्थिक विकासका मूल मुद्दामा नेपाली काँग्रेस र राप्रपा एक ठाउँमा रहेकाले सहकार्य र चुनावी तालमेल भएको हो,’ भने ।
अध्यक्ष थापाले यो सहकार्य र गठबन्धन कुनै पार्टीविरुद्ध नभई प्रजातन्त्रको रक्षा, राष्ट्रिय एकता र अखण्डतालाई अक्षुण्ण राख्नका लागि भएको हो भन्दैे तालमेल भएका ठाउँमा दुवै पार्टीका मतदाताले एकअर्कालाई सघाउनुपर्नेमा जोड दिए ।
नेकपा एमाले र माओवादी केन्द्रको गठबन्धनप्रति राप्रपाको कुनै आपत्ति नरहेको उल्लेख गर्दै उनले गठबन्धनको उन्मादमा शीर्ष नेताले निर्वाचनपछि दुई तिहाइ आउने र राष्ट्रपतीय प्रणाली, अधिनायकवाद र देशमा कम्युनिष्ट शासन व्यवस्था स्थापना गर्नेजस्ता अभिव्यक्तिले नेपाली जनता शशांकित भएको छ भने ।
अध्यक्ष थापाले निर्वाचनमा मतदाता पार्टीगत स्वार्थभन्दा माथि उठेर स्वाभिमान र राष्ट्रवादी पक्षधर पार्टीका उम्मेदवारलाई जिताउनुपर्नेमा पनि जोड दिए ।
पार्टीका जिल्ला अध्यक्ष जयलाल पुनको अध्यक्षतामा भएको सो कार्यक्रममा केन्द्रीय उपाध्यक्ष दील विकास राजभण्डारी, सहमहामन्त्री हेमजंग गुरुङ, पूर्वमन्त्री तोरणबहादुर गुरुङ, गीता गुरुङ र जगत सुवेदीलगायतका वक्ताले मन्तव्य व्यक्त गरे ।
यसअघि पोखराको नयाँबजारबाट निस्केको र्याली महेन्द्रपुल हुँदै मानवअधिकार चोकमा पुगेर चुनावी सभामा परिणत भएको थियो ।
