- २०८१ बैशाख १४ शुक्रबार
काठमाडौँ । क्रिस्टियानो रोनाल्डोको रेकर्डसँगै रियल म्याड्रिडले च्याम्पियन्स लिगमा साइप्रसको क्लब एपोएलमाथि शानदार विजय हासिल गर्दै विजयी लयमा फर्किएको छ ।
गएराती च्याम्पियन्स लिगको समुह चरणको खेलमा एपोएलमाथि ६-० को जित हासिल गर्दै रियल म्याड्रिडले अन्तिम १६ मा आफ्नो ठाउँ पनि सुरक्षित गरेको छ ।
रियलको जितमा रोनाल्डो र बेन्जमाले दुई दुई गोल गरे भने लुका मोड्रीच र नाचोले एक एक गोल गरेका थिए ।
यस खेलमा रोनाल्डोले रेकर्ड राखेका छन् । रोनाल्डोले सन् २०१७ मा आफ्नो १७ र १८औ च्याम्पियन्स लिग गोल गरे । यो कुनै पनि खेलाडीले एक बर्षमा च्याम्पियन्स लिगमा गरेको धेरै गोलको रेकर्ड हो । यस अघि रोनाल्डोले नै सन् २०१५ मा १६ गोल गरेका थिए ।
जितसँगै रियलको समुह एच मा ५ खेलमा १० अंक सहित अन्तिम १६ मा आफ्नो स्थान सुरक्षित गरेको छ । यसै समुहमा टोटनह्यामले डोर्टमण्डलाई २-१ ले पराजित गरेको छ।
