- २०८३ कार्तिक १० मंगलबार
पोखरा । पोखरा महानगरपालिकाले चालु आर्थिक वर्ष २०८३/८४ का लागि स्वीकृत कार्यक्रमअनुसार ६ प्रकारका सीप विकास तालिम सञ्चालन गर्ने भएको छ ।
महानगरको व्यवसाय प्रवर्द्धन केन्द्रले इच्छुक नेपाली नागरिकलाई तालिममा सहभागी हुन आवेदन दिन आग्रह गर्दै सूचना सार्वजनिक गरेको छ । तालिमका लागि योग्यता पुगेका इच्छुक व्यक्तिले सूचना पहिलोपटक प्रकाशित भएको मितिले २१ दिनभित्र व्यवसाय प्रवर्द्धन केन्द्रको कार्यालयमा आवेदन पेस गर्नुपर्नेछ ।
केन्द्रले सार्वजनिक गरेको सूचनाअनुसार वेटर तथा वेट्रेस, केयर गिभर, कुक, बारिस्ता, सहायक ब्युटिसियन र बाल विकास सहजकर्ता तालिम सञ्चालन गरिनेछ । प्रत्येक तालिममा २० जनाका दरले कुल १२० जनालाई सहभागी गराउने लक्ष्य राखिएको छ । वेटर तथा वेट्रेस, केयर गिभर, कुक र बाल विकास सहजकर्ता तालिमको अवधि ३२० घण्टा तोकिएको छ भने बारिस्ता र सहायक ब्युटिसियन तालिम १६० घण्टाको हुनेछ ।
तालिममा सहभागी हुन आवेदन दिने व्यक्तिको उमेर १८ वर्ष पूरा भई ४५ वर्ष ननाघेको हुनुपर्नेछ । शैक्षिक योग्यताअन्तर्गत वेटर तथा वेट्रेस तालिमका लागि कक्षा ८ उत्तीर्ण हुनुपर्नेछ । केयर गिभर, कुक, बारिस्ता र सहायक ब्युटिसियन तालिमका लागि एसएलसी वा एसईई उत्तीर्ण हुनुपर्ने व्यवस्था छ। बाल विकास सहजकर्ता तालिममा सहभागी हुन कक्षा १२ उत्तीर्ण गरेको हुनुपर्ने सूचनामा उल्लेख छ ।
आवेदन दिन इच्छुक व्यक्तिले सम्बन्धित वडाको सिफारिस, नेपाली नागरिकताको प्रमाणपत्रको प्रतिलिपि एक प्रति, फोटो दुई प्रति र शैक्षिक योग्यताको प्रमाणपत्रको प्रतिलिपि संलग्न गर्नुपर्नेछ। आवेदन फाराम व्यवसाय प्रवर्द्धन केन्द्रको वेबसाइट https://bpc.pokharamun.gov.np/vacancy/trainings/ बाट डाउनलोड गर्न सकिनेछ। आवश्यक कागजातसहित २०८३ कात्तिक ३० गते कार्यालय समयभित्र आवेदन पेस गर्नुपर्ने सूचनामा उल्लेख छ।
तालिमका लागि आवेदन दिएका व्यक्तिमध्ये अन्तर्वार्तामार्फत प्रशिक्षार्थी छनोट गरिनेछ। अन्तर्वार्ता २०८३ मंसिर ३ र ४ गते बिहान १०ः३० बजे व्यवसाय प्रवर्द्धन केन्द्र, पोखरा सभागृहमा हुने जनाइएको छ। आवेदन सङ्ख्या आवश्यक सङ्ख्याभन्दा कम भएमा तालिम सञ्चालन गर्ने वा नगर्ने निर्णय केन्द्रले गर्नेछ ।
