ताप्लेजुङका निमित्त स्वास्थ्य प्रमुखविरुद्ध नक्कली शैक्षिक प्रमाणपत्रको मुद्दा दायर

काठमाडौं । जिल्ला स्वास्थ्य कार्यालय, ताप्लेजुङका निमित्त कार्यालय प्रमुख सुमन प्रसाद तिवारीविरुद्ध नक्कली शैक्षिक प्रमाणपत्र पेस गरी सरकारी पदमा नियुक्ति लिएको र बढुवा भएको आरोपमा विशेष अदालत काठमाडौंमा मुद्दा दायर गरिएको छ ।

अख्तियार दुरुपयोग अनुसन्धान आयोगका अनुसार तिवारीले बिहार इन्टरमिडिएट एजुकेसन काउन्सिल, पटनाबाट जारी भएको आईए तहको झुट्टा तथा नक्कली शैक्षिक प्रमाणपत्र पेस गरी खोप सुपरभाइजर पदमा नियुक्ति लिएका थिए । उनले सोही प्रमाणपत्र पटक–पटक पेस गरी माथिल्लो पद तथा श्रेणीमा बढुवा भएको र राष्ट्रसेवकका रूपमा विभिन्न लाभ तथा सुविधा प्राप्त गरेको अनुसन्धानबाट देखिएको आयोगले जनाएको छ ।

तिवारीविरुद्ध साविक भ्रष्टाचार निवारण ऐन, २०१७ को दफा १२ र २९(२) तथा प्रचलित भ्रष्टाचार निवारण ऐन, २०५९ को दफा १६(१) बमोजिम कैद र जरिवानाको सजाय माग गर्दै आरोपपत्र दायर गरिएको हो ।