- २०८३ असोज १७ शनिबार
काठमाडौँ । राष्ट्रिय स्वतन्त्र पार्टी (रास्वपा) को केन्द्रीय समिति बैठक आज बस्दैछ ।
पार्टी सभापति रवि लामिछानेको अध्यक्षतामा दिउँसो ३ बजे काठमाडौँको वनस्थलीस्थित घन्टीघरमा बैठक बस्न लागेको हो ।
पार्टी प्रवक्ता जगदीश खरेलका अनुसार बैठकमा आगामी स्थानीय निर्वाचनका लागि केन्द्रीय उम्मेदवार छनोट समिति सदस्य मनोनयन गर्ने विषयमा छलफल हुनेछ । साथै विभिन्न विभागका प्रमुख र उपप्रमुख मनोनयनसम्बन्धी प्रस्ताव पनि बैठकमा प्रस्तुत हुनेछ ।
बैठकमा केन्द्रीय समिति तथा प्रतिनिधिसभा सदस्यको नेतृत्वमा सञ्चालन गर्ने ‘हामी आउँदै छौँ’ अभियानका विषयमा पनि छलफल हुने कार्यसूची रहेको छ । अभियानको सञ्चालन र संगठन विस्तारसँग सम्बन्धित विषयमा बैठकले आवश्यक निर्णय गर्ने जनाइएको छ । त्यसैगरी मधेस प्रदेश संगठनको अडिट प्रतिवेदनमाथि पनि छलफल हुने भएको छ ।
