- २०८३ असोज ११ आइतबार
काभ्रे । लगातारको वर्षाका कारण काभ्रेका विभिन्न स्थानमा सडक भासिने, कटान हुने तथा पहिरो खस्ने क्रम बढेपछि बीपी राजमार्गसहित विभिन्न सडकखण्ड अवरुद्ध भएका छन् ।
बीपी राजमार्गअन्तर्गत नमोबुद्ध नगरपालिका–६ चौकीडाँडामा करिब २५० मिटर सडक बगेको छ। यस्तै, रोशी गाउँपालिका–७ घुमाउनेमा सडक कटान भएको छ भने सोही वडाको चारसयमा पहिरो गएको छ ।
रोशी गाउँपालिका–८ गिम्दीबेँसीमा ढुंगा र लेदोसहित पहिरो खसेको छ। रोशी–११ कालढुंगामा सडक कटान हुनुका साथै पिप्लेमा पहिरो गएको छ। रोशी–१२ माम्तीमा समेत सडक कटान भएको जनाइएको छ । यसैबीच, धुलिखेल नगरपालिका–८ जिपलाइनस्थित अरनिको राजमार्गमा सडक माथिबाट ढुंगा–माटोसहित पहिरो खसेर सडक पूर्ण रूपमा अवरुद्ध भएको जिल्ला प्रहरी कार्यालय काभ्रेले जनाएको छ ।
काभ्रेभञ्ज्याङबाट नमोबुद्ध जाने भित्री सडकखण्ड करिब २५ मिटर भासिएर अवरुद्ध भएको छ। रोशी गाउँपालिका–७ घुमाउनेमा खोलाको पानी बढेर एकतर्फी सञ्चालनका लागि खोलिएको सडकसमेत कटान गरिरहेको प्रहरीले जनाएको छ ।
त्यस्तै, पनौती नगरपालिका–१० पाटीखर्कदेखि बेथानचोक गाउँपालिका–४ खहरेखोलासम्मको भित्री सडकखण्डमा ठाउँ–ठाउँमा सडक अवरुद्ध भएको छ । काभ्रेमा आज पनि लगातार पानी परिरहेको र सडक खुलाउने समय निश्चित नभएको जनाइएको छ।
