काठमाडौँमा ग्यासको चरम अभाव, महानगर प्रहरीले वितरणमा सहजीकरण गर्दै

काठमाडौँ । काठमाडौँमा खाना पकाउने ग्यासको चरम अभाव भएपछि वितरणलाई व्यवस्थित र सहज बनाउन काठमाडौं महानगर प्रहरी बल सक्रिय भएको छ ।

ग्यास नपाउने, पहुँचका आधारमा वितरण हुने तथा विद्यार्थीसहित सर्वसाधारणले सास्ती खेप्नुपरेको गुनासो बढेपछि महानगर प्रहरीले ग्यास डिपोमा अनुगमन र सहजीकरण थालेको बताएको छ ।

महानगर प्रहरीका प्रमुख वरिष्ठ नगर प्रहरी उपरीक्षक विष्णुप्रसाद जोशीका अनुसार डिपोमा उपलब्ध ग्यास सबै उपभोक्ताले सहज रूपमा पाउने वातावरण बनाउन सहजीकरण गरिनेछ। साथै सिलिन्डरको तौल, म्याद, अग्नि सुरक्षा उपकरण, भण्डारण तथा ढुवानीको अवस्थासमेत नियमित रूपमा अनुगमन गरिने उनले बताए ।

सहजीकरण अभियानअन्तर्गत मंगलबार अनामनगर क्षेत्रका ग्यास डिपोको अनुगमन गरिएको थियो । साना डिपोमा ग्यास उपलब्ध भए पनि ठूला डिपोमा उपभोक्ताको अत्यधिक भीड देखिएको महानगरले जनाएको छ। उता नेपाल आयल निगमले भने ग्यास आपूर्ति नियमित रहेको र उपभोक्ताको माग एक्कासि बढेकाले वितरणमा चाप परेको जनाएको छ ।