बालोन डी ओरको सबैभन्दा बलियो दाबेदार बने ह्यारी केन

काठमाडौँ । जर्मन क्लब बायर्न म्युनिखका इङलिश स्टार स्ट्राइकर ह्यारी केन सन् २०२६ को विश्व फुटबलको प्रतिष्ठित व्यक्तिगत पुरस्कार 'बालोन डी ओर' का सबैभन्दा बलिया दाबेदारका रूपमा उभिएका छन् ।

स्पेनलाई विश्वकप उपाधि दिलाएका किशोर खेलाडी लामिन यमालले उत्कृष्ट प्रदर्शन गरे पनि व्यक्तिगत प्रदर्शनका आधारमा केन नै अघि रहेको विश्लेषण गरिएको छ ।

सन् २०२५-२६ को सिजनमा केनले क्लब र राष्ट्रिय टोलीबाट गरी ७३ गोल गरेका छन् भने आठ गोलका अवसर सिर्जना गरेका छन् । उनले बायर्नलाई जर्मन बुन्डेसलिगा, जर्मन कप र जर्मन सुपरकपको उपाधि जिताउन महत्वपूर्ण भूमिका खेलेका थिए । साथै, इङ्ग्ल्यान्डलाई विश्वकपको सेमिफाइनलसम्म पुर्‍याउने क्रममा उनले छ गोल गरेका थिए । साथै विश्वकपमा इङ्ग्ल्यान्ड तेस्रो भएको थियो ।  

लामो समयसम्म टोलीसँग कुनै ठूलो उपाधि जित्न नसकेको आलोचना खेप्दै आएका केनले यसपटक टोलीगत सफलतासँगै व्यक्तिगत रूपमा पनि असाधारण प्रदर्शन गरेपछि बालोन डी ओरका प्रमुख दाबेदार बनेका हुन् ।

यस वर्षको बालोन डी ओर प्रतिस्पर्धा पछिल्ला दुई दशककै सबैभन्दा खुला मानिएको छ । लियोनेल मेसी र क्रिस्टियानो रोनाल्डोको वर्चस्व अन्त्यतिर पुगेपछि विश्वका धेरै खेलाडीले यो प्रतिष्ठित पुरस्कार जित्ने सम्भावना देखिएको छ ।

गत वर्ष पेरिस सेन्ट जर्मेनलाई पहिलो पटक युरोपेली च्याम्पियन्स लिगको उपाधि दिलाउन योगदान दिएका उस्मान डेम्बेलेले बालोन डी ओर जितेका थिए । यस वर्ष पनि उनी प्रतिस्पर्धामा रहे पनि ह्यारी केन, लामिन यमाल, किलियन एम्बाप्पे, एर्लिङ हालान्ड, रोड्री र भिनिसियस जुनियरजस्ता खेलाडीबीच कडा प्रतिस्पर्धा हुने अपेक्षा गरिएको छ ।

विश्वकप सम्पन्न भइसकेकाले अब सिजनभर क्लब र राष्ट्रिय टोलीबाट गरेको प्रदर्शनका आधारमा विजेताको छनोट हुनेछ । अफ्रिका कप अफ नेसन्सको प्रदर्शनलाई समेत मूल्याङ्कनमा समावेश गरिने भएकाले अन्तिम नतिजामा त्यसको पनि प्रभाव पर्नेछ ।

सन् २०२६ को बालोन डी ओर विजेताको घोषणा आगामी अक्टोबर २६ मा लन्डनमा आयोजना हुने विशेष समारोहमा गरिने बताइएको छ ।