राजेश हमालको प्रश्न- देशको शासन अन्दाज र परीक्षणको भरमा सञ्चालन गर्नु कत्तिको बुद्धिमानी हो ?

काठमाडौँ । महानायक राजेश हमालले देशको शासन प्रणाली ‘हिट एन्ड मिस’ अर्थात् अन्दाज र परीक्षणको भरमा सञ्चालन गर्नु बुद्धिमानी नहुने टिप्पणी गरेका छन् ।

सामाजिक सञ्जालमार्फत आफ्नो धारणा सार्वजनिक गर्दै उनले कुनै पनि राष्ट्रको भविष्य संयोगका आधारमा नभई दूरदृष्टि, तथ्यमा आधारित निर्णय र दीर्घकालीन रणनीतिबाट निर्माण हुनुपर्ने बताएका छन् ।

हमालले भविष्यप्रतिको स्पष्ट दृष्टिकोण र आगामी पाँच, १० वा २० वर्षमा देश कहाँ पुग्नेछ भन्ने यथार्थपरक पूर्वानुमानबिना शासन सञ्चालन गरिनु चिन्ताको विषय भएको उल्लेख गरेका छन् ।

उनका अनुसार शासन केवल दैनिक व्यवस्थापनका समस्यामै सीमित रहिरहने हो भने तीव्र रूपमा परिवर्तन भइरहेको वर्तमान विश्वमा देश प्रगतितर्फ नभई ठप्प अवस्थातर्फ उन्मुख हुन सक्ने जोखिम रहन्छ ।

उनले राष्ट्रको दीर्घकालीन विकासका लागि स्पष्ट योजना, दूरदृष्टि र तथ्यमा आधारित नीतिगत निर्णय आवश्यक रहेकोमा जोड दिएका छन् ।