- २०८३ जेठ २१ बिहीबार
काठमाडौँ । टिकटकको मूल कम्पनी बाइटडान्सका सह–संस्थापक झाङ यिमिङ मुकेश अम्बानीलाई पछि पार्दै एसियाका दोस्रो धनी व्यक्ति बनेका छन् ।
ब्लुमबर्ग अर्बपति सूचकांक अनुसार झाङको कुल सम्पत्ति ९३ अर्ब डलर पुगेको छ ।
यता रिलायन्स उद्योग समूहका अध्यक्ष तथा प्रबन्ध निर्देशक मुकेश अम्बानीको सम्पत्ति ८६ अर्ब डलर रहेको छ । एसियाका सबैभन्दा धनी व्यक्ति भने अडानी समूहका मालिक गौतम अडानी हुन् । उनको कुल सम्पत्ति ११५ अर्ब डलर रहेको छ । अडानी विश्वका धनी व्यक्तिहरूको सूचीमा १७औँ स्थानमा छन् ।
झाङको सम्पत्ति बढ्नुमा बाइटडान्सको मूल्यांकन वृद्धि र डौबाओ नामक कृत्रिम बुद्धिमत्ता आधारित संवाद सहायकको सफलताले मुख्य भूमिका खेलेको बताइएको छ । यो प्रणाली ओपनएआईको च्याटजीपीटी र गुगलको जेमिनाइ जस्तै उन्नत प्रविधिमा आधारित छ । चीनमा मात्रै यसका करिब ३० करोड प्रयोगकर्ता रहेका छन् ।
सन् २०१९ देखि अहिकेसम्म झाङको सम्पत्ति करिब सात गुणाले बढेको छ ।
अमेरिकामा टिकटकको व्यवसाय बिक्री प्रक्रियासम्बन्धी विवाद समाधान भएसँगै कम्पनीको संकट कम भएको बताइएको छ । ब्लुमबर्गले कम्पनीको मूल्यांकनमा गरिएको जोखिम कटौती २५ प्रतिशतबाट घटाएर १० प्रतिशतमा झारेपछि झाङको सम्पत्तिमा ठूलो वृद्धि देखिएको हो । २०२७ सम्म बाइटडान्सले कृत्रिम बुद्धिमत्ता क्षेत्रमा करिब ७० देखि ८९ बिलियन डलरसम्म लगानी गर्ने योजना बनाएको छ ।
विश्वका सबैभन्दा धनी व्यक्ति एलोन मस्क रहेका छन् । उनको कुल सम्पत्ति ७२६ अर्ब डलर रहेको छ । दोस्रो स्थानमा गुगलका सह–संस्थापक ल्यारी पेज र तेस्रो स्थानमा ल्यारी एलिसन रहेका छन् ।
