लामिन यमल यस सिजनका खेल खेल्न नसक्ने, बार्सिलोनालाई धक्का

काठमाडौँ । स्पेनिस क्लब बार्सिलोनाका युवा खेलाडी लामिन यमल ला लिगाको बाँकी सिजनबाट बाहिरिएका छन् । ह्यामस्ट्रिङ चोटका कारण उनी अब बाँकी खेलहरू खेल्न नसक्ने भएका हुन् ।

क्लबका अनुसार गरिएको स्वास्थ्य परीक्षणमा उनको खुट्टाको मांसपेशी च्यातिएको देखिएको छ । त्यसपछि क्लबले दीर्घकालीन फिटनेसलाई ध्यानमा राख्दै सावधानीपूर्वक उपचार योजना अपनाउने निर्णय गरेको जनाएको छ ।

यो चोट ला लिगाअन्तर्गत सेल्टा भिगोविरुद्धको खेलमा लागेको हो । उक्त खेलमा बार्सिलोनाले १–० को झिनो जित निकालेको थियो । सो खेलमा यमलले पेनाल्टी गोल गरेका थिए ।

गोल गरेलगत्तै उनले खुट्टामा असहज महसुस गर्दै मैदानमै लडेको देखिएको थियो । चिकित्सक टोलीले तुरुन्तै जाँच गरेपछि उनलाई मैदानबाट बाहिर लगिएको थियो । उनी आफैं हिँडेर बाहिरिए पनि सिधै ड्रेसिङ रुमतर्फ गएको दृश्यले चोट गम्भीर भएको संकेत दिएको थियो ।

पछि गरिएको विस्तृत परीक्षणमा उनको देब्रे खुट्टाको मांसपेशी च्यातिएको पुष्टि भएको हो । यससँगै क्लबले जोखिम नलिँदै उनलाई सिजनका बाँकी खेलबाट बाहिर राख्ने निर्णय गरेको छ । यमलको इन्जुरी बार्सिलोनाका लागि ठुलो धक्काको रुपमा हेरिएको छ ।

यद्यपि, फिफा विश्वकपसम्म उनी निको हुने आशा गरिएको छ । उपचार र पुनःस्थापनाको प्रक्रिया ठीकसँग अघि बढेमा उनी प्रतियोगितामा खेल्न सक्ने सम्भावना रहेको जनाइएको छ ।

यसबीच स्पेनको राष्ट्रिय टोलीले पनि उनको अवस्थामाथि नजिकबाट निगरानी राखिरहेको जनाएको छ । छोटो समयमै अन्तर्राष्ट्रिय फुटबलमा प्रभाव जमाएका यमलको उपलब्धता टोलीका लागि महत्वपूर्ण मानिएको छ ।