- २०८३ बैशाख ७ सोमबार
काठमाडौँ । राष्ट्रिय सभा अध्यक्ष नारायणप्रसाद दाहाल र अष्ट्रेलियाको प्रतिनिधि सभाका सभामुख मिल्टन डिकबीच शिष्टाचार भेटवार्ता भएको छ ।
टर्कीको इस्तानबुलमा जारी अन्तर व्यवस्थापिका सङ्घको १५२औँ महासभाको क्रममा भएको भेटमा दुई देशबीचको सम्बन्ध, आपसी हित तथा संसदीय सहकार्यका विषयमा छलफल भएको जनाइएको छ ।
भेटमा अध्यक्ष दाहालले संसदीय सहकार्य विस्तार, अनुभव आदानप्रदान तथा सिधा हवाई सेवा सञ्चालनको आवश्यकता औंल्याएका छन् । उनले अष्ट्रेलियामा रहेका नेपाली समुदायको शिक्षा, रोजगारी र सुरक्षामा ध्यान दिन आग्रह गरेका छन् ।
सभामुख डिकले नेपाल–अष्ट्रेलिया सम्बन्ध सौहार्दपूर्ण रहेको उल्लेख गर्दै संसदीय सहकार्य थप मजबुत बनाउने बताएका छन् । उनले शैक्षिक सहकार्य र हवाई सेवाका विषयमा सकारात्मक रहेको पनि जानकारी दिएका छन् ।
