काठमाडौँ । वेस्ट इण्डिजका अलराउण्डर आन्द्रे रसेलले इण्डियन प्रिमियर लिग (आइपिएल) बाट सन्यासको घोषणा गरेका छन् ।
आइपिएलका ११ सिजन कोलकोता नाइट राइडर्सबाट खेलेका रसेलले आइतबार आइपिएल नखेल्ने घोषणा गरेका हुन् । ३७ बर्षिय रसेललाई कोलकोताले आगामी अक्सन अघि टिमबाट रिलिज गरेको थियो ।
रसेलले अब आइपीएल नखेल्ने घोषणा गर्दै कोलकोताको प्रशिक्षकको टिममा रहने बताएका छन् । उनले भनेका छन्- 'अनि सबैभन्दा राम्रो कुरा के हो भने, म घर छोडेर जाँदै छैन, तपाईंले मलाई २०२६ को पावर कोचको रूपमा केकेआरको सपोर्ट स्टाफमा नयाँ भूमिकामा देख्नुहुनेछ ।'
रसेलले २०१२ र २०१३ सिजन दिल्लीबाट खेलेका थिए भने त्यसपछिका ११ सिजन कोलकोताबाट खेलेका थिए । उनले कोलकोताबाट १३३ खेल खेलेका छन् ।









