- २०८१ बैशाख १६ आइतबार
काठमाडौँ । अनलाइन बेटिङ एप 'वान एक्स बेट' मा सट्टेबाजी गर्ने र त्यसको विज्ञापन गरेको आरोपमा 'बल्छी ध्रुबे' नामले चर्चित कलाकार मरिचमान श्रेष्ठसहित ८ जना पक्राउ परेका छन् ।
पक्राउ परेका कलाकारहरूले युट्युबमार्फत् वानएक्स बेटको विज्ञापन गरेको आरोप छ । युट्युबमा प्रोमो कोड प्रयोग गरी वानएक्स बेटिङमा छुट प्राप्त गर्न सकिने भन्दै विज्ञापन गरेको देखिएको प्रहरीले जनाएको छ ।
यसरी कलाकार एवं युट्युबरहरूले विज्ञापन गरेर बेटिङमा युवापुस्तालाई आकर्षण गर्ने गरेको भन्दै कार्यालयले अपरेसन चलाएको थियो । त्यसरी अपरेसन चलाएर बुधबारमात्रै बेटिङका पाँच जना एजेन्टलाई पक्राउ गरी सार्वजनिक गरेको थियो ।
पाँच जनाले मात्रै ७४ करोडको कारोबार गर्ने गरेको प्रहरीको अनुसन्धानबाट खुलेको जनाएको छ ।
