- २०८१ बैशाख १५ शनिबार
काठमाडौँ / प्रतिनिधिसभाको आजको बैठकमा ‘सार्वजनिक सुरक्षा (तेस्रो संशोधन) विधेयक, २०७५ माथि विचार गरियोस् भन्ने प्रस्तावलाई सर्वसम्मतिले स्वीकृत गरेको छ ।
गृहमन्त्री रामबहादुर थापाले बैठकमा सो विधेयक प्रस्तुत गरेका थिए । विधेयकमाथि सांसद कृष्णभक्त पोखरेलले आफ्नो धारणा राखेका थिए ।
राष्ट्रिय तथा स्थानीय समस्या समाधानका लागि सरकारको ध्यानाकर्षण
यसैबीच, प्रतिनिधिसभाको आजको बैठकको विशेष समयमा सांसदहरुले राष्ट्रिय तथा स्थानीय समस्या समाधानका लागि सरकारको ध्यानाकर्षण गराए । उनीहरुले विकास निर्माणको काम प्रभावकारी नभएको, निर्माण व्यवसायीले जिम्मा लिएको काम समयमा नगरेको भन्दै सरकारी निकायले ध्यान दिनुपर्नेमा जोड दिए ।
कतिपय जिल्लामा निर्माण व्यवसायीले काम जिम्मा लिने, केही काम गर्ने र विभिन्न बहाना बनाएर उम्कने गरेको भन्दै उहाँहरुले त्यस्ता निर्माण व्यवसायीलाई कानूनको दायरामा ल्याउन आग्रह गरे ।
उनीहरुले तराई मधेशका विभिन्न जिल्लामा लामो समयदेखि नागरिकले नागरिकता नपाएका कारण सरकारबाट पाउनुपर्ने सेवा सुुविधासमेत नपाएको भन्दै गुनासो गरे । सांसद प्रदीप यादवले नयाँ संविधान जारी भएको दुई वर्ष पूरा भइसक्दासमेत नेपाली नागरिकले नागरिकता नपाउने अवस्था रहनु दुःखद रहेको गुनासो गरे ।
उनले प्रमुख जिल्ला अधिकारीले नागरिकता नदिँदा तराई मधेशका बालिक नागरिक समस्यामा परेको, अध्ययन अध्यापनमा समस्या परेको, बैंक तथा वित्तीय संस्थामा खाता खोल्न नपाएको, सवारी चालक अनुमतिपत्रसमेत नपाएको भन्दै तत्काल समस्या समाधान गर्न सरकारसँग माग गरे ।
संसद्मा पार्टी एकताको स्वागत
बिहीबार नेकपा (एमाले) र नेकपा (माओवादी केन्द्र)बीच पार्टी एकता भर्ई नेपाल कम्युनिष्ट पार्टी निर्माण हुनु महत्वपूर्ण परिघटना भएको सांसदहरुले बताए। सांसद खगराज अधिकारीले दुई ठूला कम्युनिष्ट पार्टीको एकताले आर्थिक समृद्धि र विकासको मार्ग प्रशस्त गरेको बताए ।
अर्का सांसद छविलाल विश्वकर्माले पनि एमाले र माओवादी केन्द्रबीचको एकता प्रक्रियाको स्वागत गर्दै त्यसले नेपालको कम्युनिष्ट आन्दोलन र लोकतान्त्रिक आन्दोलनमा सहयोग पु¥याएको धारणा व्यक्त गरे ।
सांसद हृदयेश त्रिपाठीले पनि दुई ठूला कम्युनिष्ट पार्टीको एकतालाई स्वागत गर्दै सफलताको कामना गरे । उनले तराईका विभिन्न जिल्लामा विगतमा भएका घटनाको छानविन गर्न गठन भएको आयोगको प्रतिवेदनअनुसार काम कारवाही गर्न सरकारको ध्यानाकर्षण गराए ।
सांसद सञ्जय गौतमले एमाले र माओवादी केन्द्रको एकतालाई स्वागत गर्दै समृद्ध नेपाल निर्माणका लागि प्रमुख प्रतिपक्षीकोे तर्फबाट उचित भूमिका विर्वाह गर्ने बताए । सांसद दुर्गा पौडेलले संविधानमा उल्लेख भएको समाजवाद उन्मुख व्यवस्था कार्यान्वयनका लागि बिहीबार भएको एमाले र माओवादी केन्द्रबीचको एकता प्रभावकारी हुने विश्वास व्यक्त गरिन् ।
संघीयताका कारण विकास खर्च कटौती हुने हो कि भन्दै उनले त्यस्तो नगर्न सरकारलाई सुझाव दिइन् । सांसद पौडेलले बाँके, बर्दियालगायतका जिल्लामा चार वर्ष पहिलेका बाढीपीडितलाई हालसम्म पनि राहत नपाएको भन्दै अर्थमन्त्रालयले बजेट नदिएकोप्रति गुनासो व्यक्त गरिन् ।
स्थानीय निकायका प्रमुख उपप्रमुख तथा वडा सदस्यको सेवा सुविधाको विषयमा फरक फरक निर्णय भएको भन्दै उनले स्थानीय स्वायत्त शासन ऐन, २०५४ अनुसारको व्यवस्था गर्नुपर्नेमा जोड दिइन् ।
सांसद उमा रेग्मीले देशका विभिन्न स्थानमा महिला तथा बालबालिकामाथि बलात्कार, दुव्र्यवहार भएको, दोषीहरु खुल्मखुल्ला रुपमा हिँडिरहेको, अपराध कर्ममा संलग्नलाई सुरक्षा निकायले पक्राउ गर्न नसकेको भन्दै सरकारको ध्यानाकर्षण गराइन् ।
सांसद देवेन्द्रराज कँडेलले महिला हिंसाका दोषीलाई कानूनी कारवाही गर्न सरकारसँग माग गर्दै महिलामाथि हिंसा गर्ने र बलात्कार गर्नेलाई कडाभन्दा कडा कारवाही गर्नुपर्नेमा जोड दिए ।
सांसद कमला रोकाले रुकुम पूर्व नयाँ जिल्ला भएर पनि जनताले उचित सेवा सुविधा र औषधोपचार नपाएको तथा सरकारले कर्मचारी नपठाएको गुनासो गर्दै आगामी बजेटमा रुकुम पूर्वको भौतिक पूर्वाधारको विकासका लागि उचित व्यवस्था गर्न सरकारसंग आग्रह गरिन् ।
सभामुखले गरे सरकारको ध्यानाकर्षण
यसैबीच, सभामुख कृष्णबहादुर महराले प्रतिनिधिसभाको आजको बैठकमा सांसदहरुले उठाउनुभएको राष्ट्रिय महत्वका विषयमा सरकारको ध्यानाकर्षण गराएका छन् ।
सभामुख महराले देशका विभिन्न स्थानमा महिला हिंसा बढेको, बाढीपीडित र भूकम्पपीडितले उचित राहत नपाएको जस्ता विषयमा सांसदहरुले सरकारको ध्यानाकर्षण गराएको भन्दै सो विषयमा सरकारको धारणा मागे ।
सांसदहरुको मागलाई गम्भीरतापूर्वक लिई कार्यान्वयन गर्न सभामुख महराले सरकारलाई ध्यानाकर्षण गराए।
प्रतिनिधिसभाको अर्को बैठक यही जेठ ७ गते १५ः३० बजे बस्नेछ ।
