- २०८१ बैशाख १५ शनिबार
धुलिखेल । काभ्रेपलाञ्चोकको विकट डाँडापारीस्थित महाभारत गाउँपालिका–६ बनखुचौरको जनमोहन माविमा नयाँ विद्यालय भवन निर्माण भएको छ ।
महाभारत गाउँपालिका भित्रमा भूकम्पले क्षति पु¥याएको विद्यालय भवन पुनःनिर्माण गरेको यो नै पहिलो पक्की भवन भएको विद्यालयले जनाएको छ । भूकम्पले विद्यालयको भवन पूर्णरुपमा क्षतिभएपछि समस्या झेल्दै आएका विद्यार्थीले भवन अभावमा टहरामा बसेर अध्ययन गर्दै आइरहेका थिए ।
अहिले विद्यालयको नयाँ पक्की भवन निर्माण भएपछि विद्यार्थी, शिक्षक र अभिभावक खुशी भएका छन् । ‘जिल्लाको विकट क्षेत्रमा पनि दातृ निकाय र अभिभावकको सहयोगमा यसरी पक्की भवन निर्माण गर्न सकिने रहेछ भन्ने यो गतिलो उदाहरण हो’–शिक्षक तारा छिरिङ लामाले भने ।
नवनिर्मित भवन अपांग र बालमैत्री छ । विद्यालयका प्रधानाध्यापक रामवली सिं दनुवारले विद्यालय भवन बनेपछि पहिलाको भन्दा अझ राम्रो शिक्षा दिन पाउने बताए ।
सेभ द चिल्ड्रेनको आर्थिक तथा प्राविधिक सहयोग, नाङशाल एशोसिएशन नेपालको साझेदारी एवं जिल्ला शिक्षा कार्यालय र जिल्ला कार्यान्वयन इकाइको समन्वयमा विद्यालय ब्यवस्थापन समितिको सक्रियतामा निर्मित दूई तले ८ कोठे विद्यालय भवन निर्माण कार्य सम्पन्न भएको हो ।
कुल रु एक करोड ५२ लाख ९० हजार ९४५ को लागतमा सो भवन निर्माण भएको हो । सो विद्यालयमा ४०३ विद्यार्थी अध्ययनरत छन् । नवनिर्मित विद्यालय भवनको मंगलबार काभ्रेपलाञ्चोकका प्रमुख जिल्ला अधिकारी शिवप्रसाद सिम्खडाले उद्घाटन गरे ।
भूकम्पबाट ४९६ विद्यालयका पाँच हजार २२० कक्षाकोठा क्षति भएकामा ९५४ कक्षाकोठा पूर्ण र ९१४ कक्षाकोठा आंशिक क्षति भएको जिल्ला शिक्षा कार्यालयले जनाएको छ । तीमध्ये २०० भन्दा बढी कक्षाकोठा पुनःनिर्माण भइसकेको जिल्ला कार्यान्वयन इकाइले जनाएको छ ।
नाङशालको अगुवाइमा तीन विद्यालय निर्माण
भूकम्पले क्षति पुर्याएको विद्यालय भवनमध्ये नाङशाल एशोसिएशन नेपालको अगुवाइमा निर्माण थालनी गरिएको विद्यालय भवनमा तीन वटा नै निर्माण कार्य सम्पन्न गरी हस्तान्तरण गरिएको छ ।
नाङशालले धुलिखेल नगरपालिका–१ देवीटारमा रहेको देवीस्थान माविको दुई तले आठ कोठे, रोशी गाउँपालिका–११, भीमखोरीमा रहेको शान्तिबुद्ध प्राविको छ कोठे र डाँडापारिको महाभारत गाउँपालिका–६ वनखुचौरमा रहेको जनमोहन माविको दुई तले आठ कोठे विद्यालय भवन निर्माण गरी हस्तान्तरण गरिएको नाङशाल एशोसिएशन नेपालका अध्यक्ष दीनेश लामाले बताए ।
सेभ द चिल्ड्रेनको आर्थिक तथा प्रविधिक सहयोग, नाङशाल एशोसिएशन नेपालको साझेदारी तथा जिल्ला शिक्षा कार्यालय र जिल्ला कार्यान्वयन इकाइको समन्वयमा ती भवन निर्माण गरिएको हो ।
