- २०८२ कार्तिक २८ शुक्रबार
काठमाडौँ । नेपाली कम्युनिष्ट पार्टीले पार्टी निर्माणको प्रक्रियामा रहेकाले आयोगमा बुझाइएको संरचना अन्तिम नभएको स्पष्ट गरेको छ ।
संयोजक पुष्पकमल दाहाल प्रचण्डको सचिवालयले निर्वाचनको व्यवस्थापकीय आवश्यकता र समयको चापका कारण आयोगमा एकीकरणपूर्व कायम रहेका स्थायी समिति सदस्यहरूको सूची बुझाइएको बताउदै विधान बमोजिमको संरचना बनाउन बाँकी नै रहेको स्पष्ट गरेको हो ।
नेपाली कम्युनिष्ट पार्टीले आयोगमा बुझाएको सदस्यहरु बारे विवाद आएपछि प्रचण्डको सचिवालयले स्पष्ट पारेको हो ।
पार्टी संयोजक र सह–संयोजक बाहेकका सबै पद र समितिहरू आपसी सहमतिका आधारमा गठन हुने र यसका लागि गृहकार्य भइरहेको उल्लेख गर्दै सचिवालयले एकीकृत पार्टीको केन्द्रीय समितिसहितका सबै संरचना समेत यही प्रक्रियाअनुसार टुंगो लाग्ने बताएको छ । साथै कानुनअनुसार एक तिहाइ महिला समावेश गर्नुपर्ने बाध्यात्मक प्रावधानका कारण केन्द्रीय कार्यालयमा तत्काल उपस्थित भै हस्ताक्षर गरेका १३ जना उपलब्ध महिला केन्द्रीय सदस्यहरूको नाम पनि त्यही सूचीमा थपेर महिला प्रतिशत पुर्याइएको र यो कुनै अलग संरचना नभएको सचिवालयले स्पष्ट पारेको छ ।
सरकारले आगामी फागुन २१ गतेका लागि घोषणा गरेको आम निर्वाचनको प्रयोजनार्थ यही ३० गतेभित्र दल दर्ता गरेर प्रमाणपत्र लिइसक्नु पर्ने सूचना निर्वाचन आयोगले जारी गरेको र दल दर्ताको प्रयोजनार्थ निर्वाचन आयोगमा बुझाइएका विवरणहरूबारे केही भ्रम देखिएकाले यसमा स्पष्ट हुन अनुरोध गरेको छ ।
