काठमाडौँ । प्रधानमन्त्री थ्री नेसन्स कप फुटबल अन्तर्गत अहिले लाओसले भुटानलाई पराजित गरेको छ ।
त्रिपुरेश्वस्थित दशरथ रंगशालामा शनिबार सम्पन्न खेलमा लाओसले भुटानमाथि २-१ को गोल अन्तरको जित निकालेको हो ।
लाओसको जितमा बोउनफचान बोउनकोङले दुवै गोल गरेका थिए । उनले खेलको तेस्रो मिनेट र ७०औँ मिनेटमा गोल गरेका थिए । त्यस्तै भुटानका लागि चेन्चो ग्याल्सेनले खेलको ३५औं मिनेटमा गोल गरेका थिए ।
योसँगै जारी प्रधानमन्त्री थ्री नेसन्स कपमा फाइनलमा पुग्ने टिमको टुंगो नेपाल र भुटानबीचको अन्तिम खेलबाट लाग्ने भएको छ ।
नेपाल र भुटानबीच आगामी मंगलबार खेल हुने तालिका रहेको छ । नेपालले आफ्नो पहिलो खेलमा लाओसलाई २-० गोल अन्तरले पराजित गरेको थियो ।
यस प्रतियोगितामा प्रथम स्थान हासिल गर्ने टोलीले पाँच हजार अमेरिकी डलर प्राप्त गर्नेछन्, भने दोस्रो हुने टोलीले तीन हजार अमेरिकी डलर पाउनेछन् । त्यसैगरी हरेक खेलमा म्यान अफ द म्याच घोषित हुने खेलाडीलाई २५० अमेरिकी डलर प्रदान गरिने एन्फाले जनाएको छ ।
त्यस्तै प्रतियोगितामा उत्कृष्ट घोषित हुने खेलाडीलाई पाँच सय अमेरिकी डलर प्रदान गरिने छ । उक्त प्रतियोगितको पुरस्कार राष्ट्रिय खेलकुद परिषद् (राखेप)ले प्रदान गर्ने आयोजक एन्फाले जनाएको छ ।
त्यस्तै उक्त प्रतियोगिताको खेल र्हेर्नका लागि एन्फाले साधारण प्याराफिटतर्फ पाँच सय र भिआईपीतर्फ रु एक हजार मूल्य तोकिएको छ ।
यस प्रतियोगिताको लागि एक करोड ७५ लाख ६६ हजार चार सय ८० खर्च लाग्ने एन्फाले जानकारी दिएको छ ।