- २०८१ बैशाख १३ बिहीबार
काठमाडौँ । दिनको चार घण्टा मोबाइल फोन र अन्य डिजिटल उपकरणहरू प्रयोग गर्ने अभिभावकहरूले आफ्ना बच्चाहरूप्रतिको व्यवहार परिवर्तन गर्ने गरेको एक अध्ययनले निष्कर्ष निकालेको छ ।
क्यानडाको वाटरलू विश्वविद्यालयका अनुसन्धान विद्वानहरूले ५ देखि १८ वर्षका दुई बच्चा भएका ५४९ अभिभावकहरूबीच गरेको सर्वेक्षण अध्ययनबाट यस्तो निष्कर्ष निकालेको हो ।
यो अनुसन्धानले फुर्सदको समयमा वा आरामको समयमा फोन वा अन्य डिजिटल माध्यमको सम्पर्कमा रहेका अभिभावकहरू आफ्ना बालबालिकाप्रति चिढिने गरेको पाइएको छ । उनीहरू आफ्ना छोराछोरीलाई हप्काइरहेको र स्वाभाविक भन्दा बढी चिच्याइरहेको पाइएको उल्लेख छ ।
मोबाइल फोन र अन्य डिजिटल उपकरणहरू प्रयोग गर्ने आमाबाबुहरू मध्ये, ७५ प्रतिशतमा डिप्रेसन पनि पाइएको छ ।
अनुसन्धान कोरोना अवधिमा भएको थियो । यस समयमा स्क्रिन टाइम र डिजिटल मिडियाको प्रयोगमा उल्लेख्य वृद्धि भएको पाइएको छ । औसतमा, अभिभावकहरूले दिनको ३ देखि ४ घण्टासम्म डिजिटल उपकरण प्रयोग गर्छन् । वाटरलू विश्वविद्यालयका क्लिनिकल मनोविज्ञानका विद्वान र यस अनुसन्धानका प्रमुख लेखक जस्मिन झाङले भनिन्, परिवारको रूपमा, आमाबाबु र बच्चा दुवैको व्यवहार महत्त्वपूर्ण हुन्छ, त्यसैले हामीले अभिभावकको व्यवहारले पनि नकारात्मक प्रभाव पार्छ भन्ने पायौं ।
डिजिटल उपकरणहरूको बढेको स्क्रिन समय र व्यवहारमा परिवर्तन आएको बीचको सम्बन्ध फेला परेको अध्ययनमा उल्लेख छ ।
अनुसन्धान टोलीले यो पनि पत्ता लगायो कि जब परिवारका सदस्यहरू बीचको अन्तरक्रिया घट्यो, आमाबाबुले खराब अभिभावक बानीहरू विकास गर्न थाले ।
अनुसन्धान प्रमुख प्रा. जस्मिन झाङले दिनमा एक वा दुई घण्टा सामाजिक सञ्जालमा बिताउने अभिभावकको व्यवहार बालबालिकाप्रति बढी सकारात्मक हुने बताइन् । अभिभावकहरु सामाजिक रुपमा सक्रिय हुनुपर्ने उनको भनाइ छ । डिजिटल उपकरणको बढी प्रयोगले सामाजिक रुपमा समेत कम सक्रियता पाइएको अध्ययनमा उल्लेख गरिएको छ ।
