- २०८१ बैशाख ८ शनिबार
काठमाडौँ । फिल्म ‘प्रेमगीत ३’को हिन्दी डबलाई विदेशी फिल्म मान्दै १५ प्रतिशत विकास शुल्क लिने गरी चलचित्र विकास बोर्डले सेन्सर अनुमति दिएको छ । बुधवार बोर्ड अध्यक्ष भुवन केसीले फिल्मका निर्माता र वितरकलाई हिन्दी डबको सेन्सर अनुमति पत्र दिएका हुन् ।
फिल्मको नेपाली भर्सनको भने यसअघि नै सेन्सर भइसकेको छ ।
साथै, फिल्मका वितरकले भन्सार शुल्क बापत २० हजार रुपैयाँ समेत तिरेका छन् । अब, फिल्मको हिन्दी डबले नेपालमा गरेको कमाईको १५ प्रतिशत विकास शुल्क तिर्नुपर्ने भएको छ ।
विदेशी फिल्मले मात्र १५ प्रतिशत शुल्क तिर्नुपर्ने नियम छ । नेपाली ‘प्रेमगीत ३’ले भने यो शुल्क तिर्नु पर्दैन ।
‘प्रेमगीत ३’का निर्माताले हिन्दी भाषामा डब गर्नुअघि चलचित्र विकास बोर्डबाट पुनः स्वरांकनको अनुमति नलिएकाले विदेशी फिल्म सरह शुल्क तिर्नु पर्ने भएको छ ।
