- २०८१ बैशाख १३ बिहीबार
काठमाडौँ । बेलायतमा सत्तारुढ कन्जरभेटिभ पार्टीका सांसदहरूले गरेको विद्रोहपछि प्रधानमन्त्री बोरिस जोनसन समस्यामा परेका छन् ।
२४ घण्टाभन्दा कम अवधिमा ३९ मन्त्री र संसदीय सचिवले राजीनामा दिएका छन् । यति मात्र होइन, गृहमन्त्री प्रिती पटेल र यातायातमन्त्री ग्रान्ट साप्सलगायत दुई दर्जन वरिष्ठ मन्त्रीले बुधबार प्रधानमन्त्रीलाई भेटेर राजीनामा दिन आग्रह गरेका छन् ।
स्वास्थ्यमन्त्री साजिद जाविद र भारतीय मूलका अर्थमन्त्री ऋषि सुनकको राजीनामासँगै सुरु भएको भागदौड बुधबार पनि जारी रह्यो । वित्तीय सेवा सचिव जोन ग्लेन, सुरक्षा सचिव राहेल म्याक्लिन, निर्यात तथा समानता मन्त्री माइक फ्रीर, आवास तथा सामुदायिक कनिष्ठ मन्त्री नील ओब्रायन र शिक्षा विभागका कनिष्ठ सचिव एलेक्स बुर्गार्टसहित ३९ जनाले जोनसनमाथि अविश्वास व्यक्त गर्दै राजीनामा दिएका छन् ।
प्रधानमन्त्री जोनसनको संकटमा थप्दै, उनको सरकारका वरिष्ठ मन्त्रीहरू बुधबार साँझ प्रधानमन्त्री निवास १०, डाउनिङ स्ट्रीटमा गए र उनलाई राजीनामा दिन आग्रह गरेको मिडिया रिपोर्टमा बताइएको छ । सबैभन्दा महत्वपूर्ण कुरा त उनको कट्टर समर्थक मानिने गृहमन्त्री प्रिति पटेल पनि यी मन्त्रीमा परेकी थिइन् । जोनसनले मन्त्रीहरूलाई दबाब दिन व्यक्तिगत रूपमा भेटेका थिए । तर उनका १५ भन्दा बढी मन्त्रीहरूले अर्को चुनावमा कन्जरभेटिभ पार्टीको सम्भावना सुधार गर्न नेतृत्व परिवर्तनमा जोड दिएको बिबिसीले उल्लेख गरेको छ ।
मन्त्रीहरूको बढ्दो संख्याको बाबजुद पनि जोनसन राजीनामा दिन तयार नभएको रिपोर्टमा उल्लेख गरिएको छ । प्रधानमन्त्रीले आफ्नो राजीनामाका कारण छिट्टै निर्वाचन गर्नुपर्ने बताउँछन्, जसमा टोरीले पराजय भोग्नुपर्ने हुनसक्छ । तर, पार्टीको सम्पर्क समितिको बैठकमा उनले पूर्वनिर्वाचन वा राजीनामाको प्रश्नलाई बेवास्ता गरेका थिए ।
अर्थमन्त्री पदमा पुगेका भारतीय मूलका ऋषि सुनकले पद छाडेर राजनीतिमा कुनै पद नलिने संकेत गरेका छन् । उनले पार्टीका पूर्व उपप्रमुख सचेतक क्रिस पिन्चरको नाम नलिई प्रधानमन्त्री बोरिस जोनसनलाई प्रमुख पदमा नियुक्त गरेकोमा आलोचना गरेका थिए ।
अर्थमन्त्री ऋषि सुनकसहित दुई मन्त्रीले राजीनामा दिएपछि प्रधानमन्त्रीले दुई नयाँ मन्त्री नियुक्त गरेका छन् । अब ऋषि सुनकको स्थानमा नदीम जाहवी नयाँ अर्थमन्त्री बनेका छन् भने साजिद जावेदको स्थानमा स्टिभ बार्क्ले नयाँ स्वास्थ्यमन्त्री बनेका छन् ।
