- २०८१ बैशाख ५ बुधबार
तनहुँ । तनहुँको शुक्लागण्डकी नगरपालिकाको मेयर र उपमेयरमा गठबन्धनका उम्मेदवार निर्वाचित भएका छन् ।
मेयरमा नेपाली कांग्रेसका कृष्णराज पण्डित र उपमेयरमा नेकपा माओवादी केन्द्रका खुमबहादुर विक (राजु) निर्वाचित भएका हुन् । पण्डितले १२ हजार २६३ र विकले १० हजार २६२ मत प्राप्त गरे ।
मेयरका उम्मेदवार नेकपा एमालेको मुक्ति तिम्सिनाले नौ हजार ८४० मत प्राप्त गरे । उपमेयरमा एमालेकी फुलमाया वाग्लेले नौ हजार ९५७ मत पाइन् । मेयरमा दुई हजार ४२३ र उपमेयरमा ३०५ मतान्तर रह्यो ।
शुक्लागण्डकीमा नगरपालिकामा ६७.८५ प्रतिशत मत खसेको थियो । ३८ हजार ३१५ मतदाता रहेकोमा २५ हजार ९९७ जनाले मात्र मतदान गरेका थिए ।
अघिल्लो पटक नेपाली कांग्रेस र उपमेयरमा नेकपा एमालेले जित हासिल गरेका थिए । उपमेयर गुमाएको एमालेले वडामा समेत एक वडा कम जित दर्ता गराएको छ ।
यसपालि छ वडामा वडाध्यक्ष जितेको छ । नेपाली कांग्रेसले पाँच र नेकपा माओवादी केन्द्रले एक वडामा वडाध्यक्ष जितेका छन् । कांग्रेसले अघिल्लो पटक तीन र माओवादीले दुई वडा जितेका थिए ।
शुक्लागण्डकी नगरपालिकाको नगरसभामा नेकपा एमालेले बहुमत सदस्य जितेको छ । ३५ नगरसभा सदस्य एमालेले जितेको हो । यस्तै कांग्रेसले मेयर सहित २४ नगरसभा सदस्य र माओवादी केन्द्रले उपमेयर सहित तीन नगरसभा सदस्य जितेको छ ।
शुक्लागण्डकी–१ मा कांग्रेसका रविचन्द्र पौडेलको प्यानल विजयी छ । वडा नम्बर २ को अध्यक्षमा कांग्रेसका सुमनबहादुर राना मगरले जित्दा चार वडा सदस्य एमालेले जितेको छ ।
वडा नम्बर ३ को अध्यक्षमा कांग्रेसका सचिन भुजेल सहित प्यान विजयी भएको छ । ४ मा नेपाली कांग्रेसका राजकुमार वाग्ले निर्वाचित भए ।राजकुमारले प्यानलै विजयी भएको हो ।
वडा नम्बर ५ को अध्यक्ष नेकपा एमालेका दीर्घबहादुर थापा प्यानल सहित विजयी भए । ६ मा नेकपा एमालेका बुद्धिबहादुर थापा प्यानल सहित विजयी भए । वडा नम्बर ७ मा कांग्रेसका खड्कसिंह थापा विजयी भए ।
वडा सदस्यमा एक जना कांग्रेस र तीन जना एमालेका विजयी भए । वडा नम्बर ८ मा एमालेका नारायणसिंह थापा विजयी भए । कांग्रेसका दुई र एमालेका दुई वडा सदस्य विजयी भएका छन् । वडा नम्बर ९ को वडाध्यक्षमा नेकपा एमालेका बाबुराम पुलामी सहित प्यानल विजयी भयो ।
वडा नम्बर १० को वडाध्यक्षमा माओवादी केन्द्रका राजेन्द्र भट्टराई क्षेत्री विजयी भए । वडा सदस्य एमाले र कांग्रेसका दुई दुई जना विजयी भएका छन् । वडा नम्बर ११ को वडाध्यक्षमा सालिकराम भट्टराई विजयी भएका छन् । वडा सदस्यमा दुई जना एमाले, कांग्रेस र माओवादीका एक÷एक जना विजयी भए । वडा नम्बर १२ मा नेकपा एमालेका इन्द्र गुरुङ सहित उनको प्यानल विजयी भएको हो ।
