चर्चित निर्वाचन क्षेत्र : काठमाडौँ १ मा प्रकाशमानलाई रवीन्द्र मिश्रको कडा चुनौती 

खरीबोट
ad

काठमाडौं । आगामी मंसिर २१ मा दोस्रो चरणमा हुन गइरहेको प्रदेश तथा संसदको चुनावी प्रतिस्पर्धामा देशभरको जस्तै राजधानीको पनि १ नम्बर क्षेत्र धेरै कारणले चर्चित छ ।

काठमाडौं १ बाट नेपाली कांग्रेसका प्रभावशाली नेता प्रकाशमान सिंहका अलावा विवेकशील साझा पार्टीका रवीन्द्र मिश्र र वाम गठबन्धनबाट माओवादी केन्द्रका अनिल शर्मा मुख्य चुनावी प्रतिस्पर्धामा छन् ।

अबको विकल्प विवेकशील साझा भन्ने मूल राजनीतिक नारा बोकेर पूर्वपत्रकार रवीन्द्र मिश्र राजनीतिक यात्रामा निस्केका मात्रै होइनन्, चुनावी खालको परीक्षामा पनि सामेल भइसकेका छन् । काठमाडौं १ बाट निर्वाचित सांसद् बन्दै आफूसहितको नेतृत्वको विवेकशील साझा पार्टीलाई राष्ट्रिय पार्टी बनाउने लक्ष्यका साथ उनी चुनावी समरमा होम्मिएका छन् । काठमाडौं १ का मतदाताको घरदैलोमा मत माग्न पुगिरहँदा भने मिश्रलाई आँशु, हाँसो र भावविह्वल भएर समर्थन र सहकार्यको वचन दिने मतदाताहरु बाक्लिँदै छन् । 

उसै पनि राजनीतिको पहिलो यात्रा र पहिलो अनुभवका कारण उनी अरु प्रतिस्पर्धी दल कांग्रेस र वाम गठबन्धनको आलोचनाभन्दा आफ्नो दल विकल्प भएको तर्कहरुका साथ मत मागिरहेका छन् । उनको मत माग्ने शैली शिष्ट, भद्र, शालीन र तडकभडकरहित नै देखिँदै छ । उनले सामाजिक सञ्जालको आफ्नो ख्यातिलाई पनि चुनावी प्रचारका दौरानमा राम्रै सदुपयोग गरिरहेका छन् । सामाजिक सञ्जालको उनको प्रचार शैलीले प्रतिस्पर्धी कांग्रेसका सिंह र वाम गठबन्धनका शर्मालाई ओझेलमा नै पारेको छ ।

नयाँ पात्र, नयाँ सोच, नयाँ राजनीतिक संस्कार अभ्यासका थालनी मिश्रका चुनावी काइदा देखिएको छ । नयाँ दल र पूर्णाकार ग्रहण नगरिसकेको दल भएकै कारण पनि हुनसक्छ, उनको घरदैलो र प्रचार शैली अरु दुई प्रतिस्पर्धीजस्तो भीडभाड र झण्डावाला धेरै देखिँदैन । राजनीतिक स्टन्टबाजीमा विवेकशीलको खासै जोड देखिएको छैन । 

राजधानीवासीका दिनदिनका समस्या र सरोकारलाई सम्बोधन गर्ने गरी मतदाताकहाँ धाइरहेका मिश्रका लागि मतदाताले उत्साह थपेका अवश्य छन् । तर उनका समर्थकहरुको उत्साह कांग्रेस वा वाम गठबन्धनका उम्मेदवारलाई ओझेलमा पार्ने तहसम्मको बाक्लो र बृहत् छ÷छैन, अहिल्यै आँकलन गर्न सकिँदैन । किनभने नयाँ हुनु, वेदाग छवि रहनु, पत्रकारिता र परोपकारी विगतको लोकप्रियतालाई राजनीतिमा मिसाउनु उनका लागि सुखद पक्ष मात्रै हुन्, निर्णायक शक्ति भइसकेका छैनन् । तर उनी वाम वा कांग्रेस दुवैका लागि असरदार धक्का दिने नयाँ राजनीतिक चुनौतीका पात्र अवश्य हुन् ।

पार्टीभित्र काठमाडौं कांग्रेसकै राजनीति चलाइरहेका नेपाली कांग्रेसका प्रभावशाली नेता प्रकाशमान  सिंहका लागि जित निश्चित पनि नभएको र हारिहाल्ने खतरा पनि नभएको चुनावी परीक्षा हो २१ मंसिरको मतदान । पुराना कांग्रेस नेता हरिबोल भट्टराई सिंहका लागि आन्तरिक चुनौती बनेर सुरुमा नै धक्का दिइरहेका छन् ।

नेपाली राजनीतिमा संघर्ष, त्याग र इमानको राजनीतिमा अतुलनीय व्यक्तित्वका रुपमा स्थापित लौहपुरुष वीर गणेशमानको पुत्र हुनु राजधानीमा सिंहको राजनीति टिक्ने र जित्ने आधारस्तम्भ नै बने । तर के पटक–पटक राजधानीबाटै निर्वाचित भएर उपप्रधानमन्त्री पनि भइसकेका सिंहले यसपटक जितेर पार्टीले सरकारको नेतृत्व गर्ने अवसर आएमा प्रधानमन्त्रीमा नै दाबी गर्ने गरी काठमाडौं १ का मतदाताबाट मतादेश पाउलान त ? यो भने यसै भन्न सकिन्न । 

सिंह जनताको परीक्षमा पटक–पटक पास भएका नेता जरुर हुन् । तर उनले जनादेशको जगमा सत्तामा बसेर काठमाडौं १ का मतदातालाई के–के गुन तिरे वा लगाए ? सायद यसको असली हिसाब जनताले मतदानकै दिन गर्नेछन् । अहिलेसम्मको चुनावी चुरीफुरी हेर्दा उनी कमजोर उम्मेदवार होइनन् मात्रै भन्न सकिन्छ । पटक–पटक टेष्टेड सिंहका सामु अनटेष्टेड मिश्र र माओवादी केन्द्र तथा वाम गठबन्धनका गैरउपत्यकावासी अनिल शर्मा काठमाडौं १ का लागि नयाँ अनुहार भए पनि सिंहले सिधै निलिदिनसक्ने केटाकेटी भने अवश्य होइनन् । अन्यत्र जस्तो काठमाडौं १ का मतदातालाई सिधै यता लाग्लान, उता लाग्लान् भन्न मुस्किल छ ।

स्थानीय तहको चुनावी छायाँ काठमाडौं १ मा दोहोरियो भने मिश्रको जितको सम्भावना बढी छ । सत्ताको विपक्षमा प्रायः उभिने यहाँको जनमत यसैकारण लोकप्रिय सरकार हाक्न नसकेका कारण वर्तमान सत्ताको विपक्षमा जाँदा त्यसको असर सिंह र शर्मालाई पर्नसक्छ । वाम एकताको केन्द्रीय लहर भावनात्मक रुपमा कार्यकर्तापंक्तिसम्म फैलियो भने अनिल निल हुनबाट जोगिन पनि सक्छन् । तर एमालेको असन्तुष्ट र विवेकी तप्काले अनिललाई साथ दिने सम्भावना कमजोर देखिँदै छ ।

मुद्दा, दल र उम्मेदवारहरु हेरेर अक्सर अदलबदल भइरहने यहाँका मतदाताको रहर तराजुतिर ढल्किने सम्भावना पनि बढी नै छ । एमालेले विगतमा जितेको क्षेत्रमा माओवादीका लागि छोड्नुपरेको तोड एमाले समर्थकले मतदानमा क्रस भोटमार्फत व्यक्त गरे भने त्यसको लाभ पनि मिश्रले उठाउन सक्छन । चुनावी लहर हेरेर यता उता स्विंग भइरहने मत तान्न सिंह र शर्माभन्दा मिश्रलाई सुविधा छ । तर संगठित मतको आधार सिंह र शर्माका लागि गर या मरका स्तरमा मतदानमा बदलियो भने उनीहरुका लागि पनि चुनावी जित असम्भव भने छैन ।

मिश्रको तराजुमा काठमाडौं १ मतदाताको मतभार परे नयाँलाई राजधानीको मुख्य क्षेत्रले स्वागत गर्ने संकेत आएको बुझिनेछ । सिंहको रुखमुनि यहाँका मतदाताको मत एकीकृत भए रुखको छहारी नै उनीहरुलाई पुनः मञ्जुर भएको देखिनेछ । हसिया हतौडामा मत परे काठमाडौं १ मा वामतालमेलको असरले ओझेल परेको एमालेको सूर्य पनि चम्किनेछ । तर कसलाई कुन हैसियत देलान् काठमाडौं १ वासीले ? यो यसै भन्न कठिन छ ।

काठमाडौं १ मा जितको पुरानो रेकर्ड कायम राख्नु छ सिंहलाई । पत्रकारिता र परोपकारी कर्मबाट विश्राम लिएर राजनीतिमा हाम फालेका नवनेता मिश्रलाई पहिलो इनिङमा नै राजनीतिक सफलता चुम्नु छ । पार्टीको क्रान्तिकारी धार भुत्ते र स्खलित हुँदै गएको भए पनि आफ्नो युवामय छवि उजिल्याउनु छ शर्मालाई । एमालेका लागि वाम गठबन्धनको ओत लागेका कारण काठमाडौं १ जिते उपलब्धि, हारे हर्ष न विस्मातको चुनावी खाल मात्रै हो यसपालिको चुनावमा । बाँकी कसको भाग्य चम्काउने र कसलाई पार्टीमा नै खुम्च्याउने भन्ने फैसला त मतदाताकै विवेकमा निर्भर छ ।
 

सम्बन्धित समाचार

पाकिस्तानको निर्वाचन तालिका परिवर्तन, मुसरफ निर्वाचन लड्न पाउने संकेत

इस्लामावाद । पाकिस्तानको निर्वाचन आयोगले पूर्वघोषित निर्वाचन तालिका परिवर्तन गरेको छ ।  आम निर्वाचनको कार्यतालिका परिवर्तन गरेपनि मतदान हुने दिन भने परिवर्तन नगरिएको आयोगका अधिकारीहरुले शुक्रबार जानकारी दिएका छन् ।  नयाँ तालिका अनुसार

नेपाल कम्युनिष्ट पार्टी (नेकपा)  निर्वाचन आयोगमा दर्ता 

काठमाडौं । तत्कालीन नेकपा एमाले र माओवादी केन्द्रको एकीकरणपछिको नाम नेपाल कम्युनिष्ट पार्टी (नेकपा)  निर्वाचन आयोगमा दर्ता भएको छ । निर्वाचन आयोगले बुधबार विज्ञप्ति जारी गर्दै एमाले र माओवादी केन्द्रको एकीकरणपछि

निर्वाचनमा रूसी हस्तक्षेपबारे क्षमा याचना गर्ने ‘सम्पूर्ण अधिकार’ म सँग छ - डोनाल्ड ट्रम्प

वासिङ्टन । अमेरिकी राष्ट्रपति डोनाल्ड ट्रम्पले सोमबार अमेरिकी राष्ट्रपतीय निर्वाचनमा भएको भनिएको सम्भावित रूसी हस्तक्षेपबारे क्षमा याचना गर्ने ‘सम्पूर्ण अधिकार’ आफूमा निहित रहेको भए पनि गल्ती नै नगरेको व्यक्तिले माफी माग्नु

निर्वाचन प्रणाली परिवर्तन गर्नु आवश्यक : अध्यक्ष प्रचण्ड

पोखरा / नेपाल कम्युनिष्ट पार्टी (नेकपा) का अध्यक्ष पुष्पकमल दाहाल (प्रचण्ड)ले नेपालको विद्यमान निर्वाचन प्रणाली परिवर्तन गर्नु आवश्यक भएको बताएका छन  ।  नेपाल पत्रकार महासंघ प्रदेश नं ४ द्वारा आज यहाँ