- २०८१ बैशाख ७ शुक्रबार
काठमाडौँ, व्यावसायिक फुटबलको विकासले पछिल्लो पटक ब्राजिलियन खेलाडी नेइमारलाई किन्दा फ्रेन्सको क्लब पेरिस सेन्ट जर्मन(इएसजी) ले १९८ मिलियन पाउण्ड खर्च गरेपछि फुटबल जगतमा हलचल मच्चिएको छ ।
२५ बर्षिय खेलाडी नेइमारको ट्रान्सफर शुल्क विश्व फुटबलमा अहिलेसम्मकै धेरै हो । यतिमात्र होइन नेइमारले प्रति साता पिएसजीबाट ५ लाख पाउण्ड पारिश्रमिक पनि पाउने छन् ।
पिएसजीले गरेको यो खर्चमा प्रश्न पनि उठेको छ । ला लिगाका अध्यक्षले पिएसजीले फाइनान्सियल अनुशासन भन्दा बाहिर गएर नेइमारलाई किनेको आशंका गर्दै पिएसजीले बुझाएको रकम बुझ्न नै अस्विकार गरेका छन् । यसले नेइमारको ट्रान्सफरलाई कुनै असर नगरेपनि पिएसजीले गरेको खर्च माथि भने प्रश्न उठेको छ ।
बार्सिलोनाले त युरोपियन फुटबल महासंघले यस घटनाको छानबिन हुनुपर्ने बताएको छ । पिएसजीले गरेको खर्च हेर्दा उसको कमाइ रियल म्याड्रिड, म्यानचेस्टर युनाइटेड जस्ता ठुला क्लबको भन्दा बढी देखिएको खेल विश्लेषकहरुले बताएका छन् तर वास्तविकतामा भने त्यस्तो छैन । पिएसजीका कतारी मालिक नासिर अल खेलैफीले पिएसजीले पारदर्शी रुपमा नै नेइमारलाई किनेको भन्दै मिडियामा आएका कुरालाई आफुले प्रवाह नगर्ने बताएका छन् ।
हामीले यस लेखमा पछिल्लो २० बर्षका महंगा ट्रान्सफरको चर्चा गर्न खोजेका छौ ।
यसमा सबै भन्दा पहिला ब्राजिलका रोनाल्डोको चर्चा गरौ सन् १९९७ मा बार्सिलोनाबाट इटालीको क्लब इन्टरमिलानमा जाँदा रोनाल्डोलाई किन्न इन्टरले १९.५ मिलियन पाउण्ड खर्च गरेको थियो । त्यति बेलाको यो सबै भन्दा महँगो ट्रान्सफर शुल्क थियो । त्यसपछि सन् १९९८ मा ब्राजिलियन खेलाडी डेनील्सनले ब्राजिलियन क्लब साओ पाउलोबाट स्पेनको रियल बेटिसले किन्दा २२ मिलियन पाउण्ड खर्च गरेको थियो ।
त्यस्तै सन् २००० मा इटालीका क्रिस्टियन भियेरी लाजियोबाट इन्टरमिलानले किन्दा २८ मिलियन पाउण्ड खर्च गरेको थियो । त्यस्तै सन् २००० मा अर्जेन्टिनी खेलाडी हर्नान क्रेस्पोलाई लाजियो क्लबले पार्माबाट किन्दा ३६ मिलियन पाउण्ड खर्च गरेको थियो ।
त्यसपछिको रेकर्ड ट्रान्सफर शुल्क रियल म्याड्रिडले पोर्चुगलका खेलाडी लुइस फिगोलाई सन् २००० मा बार्सिलोनाबाट किन्दा खर्च गरेको थियो । फिगोको लागि रियलले ३७ मिलियन पाउण्ड खर्च गरेको थियो ।
फ्रान्सका चर्चित खेलाडी एवं अहिले रियल म्याड्रिडका प्रशिक्षक जिनेदिन जिदानले सन् २००१ मा युभेन्टसबाट रियल म्याड्रिड आउदा ट्रान्सफरको नयाँ रेकर्ड बनाएका थिए । जिदानक लागि रियलले त्यतिबेला ४५ मिलियन पाउण्ड खर्च गरेको थियो ।
खेलाडी ट्रान्सफरको यो रेकर्ड लामो समय सम्म तोडिन सकेन । त्यसपछि सन् २००९ मा रियल म्याड्रिडले ब्राजिलियन खेलाडी काकालाई एसी मिलानबाट ५६ मिलियन पाउण्ड तिरेर किन्यो । यसै बर्ष रियलले म्यान्चेस्टर युनाइटेडबाट पोर्चुगलका क्रिस्टियानो रोनाल्डोलाई रेकर्ड ८० मिलियन पाउन्डमा किनेर नयाँ रेकर्ड बनायो । रोनाल्डोको यो रेकर्डलाई तोड्दै सन् २०१३ मा रियलले वेल्सका खेलाडी ग्यारेथ बेललाई टोटनह्यामबाट किन्यो । बेलका लागि रियलले ८५ मिलियन पाउण्ड खर्च गरेको थियो ।
त्यसपछि २०१६ मा आएर म्यान्चेस्टर युनाइटेडले फ्रेन्च मिड फिल्डर पाउल पोग्वालाई रेकर्ड ८९ मिलियन पाउण्डमा युभेन्टसबाट किन्यो । अहिलेसम्मको रेकर्ड ब्रेक गर्दै पिएसजीले बार्सिलोनाबाट नेइमारलाई किन्न १९८ मिलियन पाउण्ड खर्च गर्यो ।
युरोपको फुटबल इतिहासमा नेइमारको ट्रान्सफर शुल्कले फुटबल दुनियाँलाई हैरान गराएको छ । अब सबैको ध्यान नेइमारले पिएसजीलाई कुन उचाईमा पुर्याउछन भन्ने रहेको छ । पिएसजीका अध्यक्षले नेइमारसंगको संयुक्त पत्रकार सम्मेलनमा नेइमारलाई गरेको खर्च केहि बर्षमै उठ्ने विस्वास व्यक्त गरे । पेरिसमा पिएसजीका फ्यानहरु नेइमारको जर्सी किन्न लाइन लाग्न थालेका तस्विर सामजिक सञ्जालमा आउन थालेका छन् जुन पिएसजीका लागि सकरात्मक देखिएका छन् ।
अब नेइमारको यो रेकर्ड कसले तोड्ला यो हेर्न भने अहिले केहि समय पर्खिनु पर्ने देखिन्छ किनकी यो तहको ट्रान्सफर शुल्क तिर्नुपर्ने खेलाडीहरु अहिले तुरुन्तै आफ्नो क्लब छोड्ने स्थिति देखिदैन ।
-एजेन्सीहरुको सहयोगमा
