काठमाडौँ । इङलिश प्रिमियर लिग फुटबल अन्तर्गत सोमबार राति भएको खेलमा लेस्टर सिटीले वेष्टब्रोमसँग बराबरीमा रोकिएको छ । घरेलु मैदानमा भएको खेलमा लेस्टर सिटीले वेष्ट ब्रोमसँग १–१ को बराबरी खेल्दै अंक बाँडेको हो ।
पहिलो हाफमा गोलरहित बराबरी भएको खेलमा ६३औं मिनेटमा नासर चाड्लीको गोलबाट वेष्टब्रोमले अग्रता लिएको थियो । तर ८०औं मिनेटमा रियाद महरेजले लेस्टर सिटीका लागि बराबरी गोल गरेर टिमलाई हारबाट जोगाएका थिए ।
महरेजले प्रिमियर लिगमा यो सिजन पहिलो गोल गरेका हुन् । यो बराबरीपछि ८ खेलबाट ६ अंक मात्रै जोडेको लेस्टर सिटी लिगको १८औं स्थानमा छ । त्यस्तै १० अंकसहित वेष्ट ब्रोम १०औं स्थानमा उक्लिएको छ ।