- २०८१ बैशाख १४ शुक्रबार
काठमाडौँ । वर्षको प्रतिक्षीत फिल्म ‘छक्का पन्जा २’ भोली बुधवारदेखि प्रदर्शनमा आउँदैछ ।
अधिकांश सिंगल हलमा आफ्नो उपस्थिति जनाउन लागेको यो फिल्मले मल्टिप्लेक्स हलमा पनि सर्वाधिक शो पाएको छ । ‘छक्का पन्जा २’ले राजधानीका क्युएफएक्स अन्तर्गतका हलहरुमा मात्रै २६ शो पाएको छ । यो फिल्मले क्युएफएक्समा नेपाली फिल्महरुमध्ये सर्वाधिक शो पाएको हो ।
लविम मल, सिभिल मल, कुमारी र जय नेपालमा ‘छक्का पन्जा २’ को बुकिङ आइतवारबाट खुल्ला गरिएको छ । खुल्ला गरिएको २४ घण्टा नवित्दै आक्रामक बुकिङले गर्दा फिल्मको ओपनिङ कस्तो हुने भन्ने समेत चर्चा बढेको छ । फिल्म २ घण्टा १७ मिनेट लामो रहेको छ । दीपाश्री निरौला निर्देशित फिल्मले पहिलो दिन नै करोड ग्रस कलेक्सन गर्ने अनुमान लगाईएको छ ।
फिल्मको गीत नाइलनको साडीमा अलिकति विवादमा आएपनि दर्शकले अत्यधिक मन पराएका छन् । त्यस्तै अर्को गीत झ्याम्म झ्याम्म पनि फरक शैलीको भएकै कारण दर्शकले मन पराएका छन् । छक्का पन्जा २ ले यस अघि छक्का पन्जाले राखेको रेकर्ड तोड्ने फिल्म विश्लेषकहरुले अनुमान लगाएका छन् ।
फिल्ममा स्वस्तिमा खड्का, स्वरूपपुरुष ढकाल, दीपकराज गिरी, केदार घिमिरे, जितु नेपाल, शिवहरी पौडेल, गौरव पहारी, बुद्धि तामाङ, प्रियंका कार्की, किरण केसी, बर्षा राउत, निश्चल बस्नेत, आयुष्मान देशराज श्रेष्ठ लगायतका कलाकारहरुको अभिनय रहेको छ ।
फिल्मको पटकथा तथा संवाद दीपकराज गिरी, केदार घिमिरे, जितु नेपाल र अभिमन्यू निरवीले लेखेका हुन् । दीपक-दीपाको प्रस्तुतीमा तयार भएको यो फिल्ममा जीतु नेपाल, माग्ने बुढो डटकम, ताराचन्द्र चापागाँई, सुमन गिरीको लगानी रहेको छ । फिल्मका कार्यकारी निर्माता विकास आचार्य हुन् ।
