काठमाडौँ । शनिबार इंग्लिश प्रिमियर लिगअन्तर्गत भएको खेलमा म्यानचेस्टर सिटीले लिभरपुललाई ५–० को गोल अन्तरले हराएको छ ।
खेलको २४ औं मिनेटमा म्यानचेस्टर सिटीका लागि सर्जियो अग्युरोले गोल गर्दै अग्रता दिलाएका थिए । पहिलो हाफको इन्ज्युरी समयमा सिटीका लागि जिससले गोल गरेका थिए ।
जिससले नै खेलको ५३ औं मिनेटमा गोल गर्दै ३–० को अग्रता बनाए । खेलको ३७औं मिनेटमा लिभरपुलका खेलाडी साडियो मानेले रातो कार्ड खाँदै बाहिरिएपछि सिटी लिभरपुलमाथि हाबी भएको थियो ।
सिटीका लिरोय सानेले खेलको ७७औं मिनेटमा तथा खेल सकिन केही समय बाँकी रहँदा गोल गर्दै म्यानचेस्टर सिटीलाई ५-० को जित दिलाएका थिए । म्यान्चेस्टर सिटीका सर्जियो अग्युरोले सिटीका लागि यस खेलमा १२४औ गोल गर्दै युरोपियन लिगमा अहिलेसम्मकै धेरै गोल गर्ने नन युरोपियन खेलाडी बनेका छन् ।