- २०८१ बैशाख ७ शुक्रबार
मुम्बई । टर्कीको वित्तीय सङ्कटको प्रभावस्वरुप लगानीकर्ताहरुमा देखिएको त्रासका कारण अमेरिकी डलरको तुलनामा भारतीय रुपैयाँको मूल्य खस्किएको छ । मङ्गलबार बजार खुल्दा एक अमेरिकी डलर भारु ७० मा किनबेच भएको छ । यो अहिलेसम्मकै उच्च मूल्य हो ।
पहिल्यैदेखि दबाबमा कारोबार भइरहेको भारतीय मुद्राको स्थिति मङ्गलबार बिहानदेखि नै खस्केको थियो । टर्कीको मुद्रा लीराको मूल्यमा भारी गिरावट आएसँगै उदीयमान अर्थतन्त्र भएका मुलुकहरुमा त्यसको नकारात्मक प्रभाव देखिएको छ ।
गत हप्तादेखि नै टर्कीको झैं दक्षिण अफ्रिका, अर्जेन्टीना, मेक्सिको, ब्राजिल र रसियाको मुद्रा कमजोर हुँदै गएको छ । यी मुलुकहरु बिदेशी पूँजी, खासगरी डलरमा, ज्यादै निर्भर छन् ।
भारतीय रुपैंयाको परिवत्र्य दर अमेरिकी डलरको तुलनामा सन् २०१८ मा कमजोर हुँदै गएको थियो । सन् २०१८ को प्रारम्भमा अमेरिकी डलरको तुलनामा भारतीय रुपैयाँको परिवत्र्य दर ६३.६७ रुपैयाँ थियो ।
भारतको सबैभन्दा ठूलो आयात नै खनिज तेल हो । भारतले कूल आवश्यकताको दुई तिहाई तेल आयात गर्दछ । विश्लेषकहरुका अनुसार, कच्चा इन्धनको मूल्यमा हुने वृद्धिले भारतीय मुद्राको अवमूल्यन हुने गर्दछ र लगानीकर्ताका लागि भारतीय रुपैयाँ त्यति आकर्षक रहँदैन ।
रुपैयाँमा आएको कमीले भारतको चालू खाता घाटालाई थप वृद्धि गर्ने बताइएको छ ।
