- २०८१ बैशाख ८ शनिबार
जुम्ला । कर्णाली स्वास्थ्य विज्ञान प्रतिष्ठान शिक्षण अस्पतालमा गम्भीर घाइते भएका जिल्ला प्रहरी कार्यालयका प्रहरी जवान कमल शर्मा उपाध्यायलाई थप उपचारका लागि काठमाडौं लगिएको छ ।
घाइते कमललाई फिस्टेल एयरको हेलिकप्टरबाट थप उपचारका लागि काठमाडौं पठाइएको जिल्ला प्रहरी कार्यालयले जनाएको छ ।
जुम्लामा पछिल्लो २० दिनदेखि अनसनरत रहेका डा. गोविन्द केसीलाई काठमाडौं लैजाने प्रयासमा दोहोरो झडपहुदा प्रहरी जवान कमल गम्भीर घाइते भएका थिए ।
उनको दायाँ फोक्सो छेडिएको र मुटुको समस्या भएको उपचारमा संलग्न डाक्टरहरुले बताएका छन् । उनलाई गोलि लागेको या सिसाले लागेको भन्ने अझै प्रष्ट हुन् सकेको छैन । सुरुमा प्रहरीले चलाएको गोली लागेर घाइते भएको भनिए पनि प्रहरीले गोली नचलाएको दाबि गरिरहेको छ ।
उनलाई भेन्टिलेटरमै काठमाडौं शिक्षण अस्पतालमा रिफर गरिएको उपचारमा संलग्न चिकित्सकहरुले जनाएका छन् । दाँया फोक्सोभित्र कुनै वस्तु रहेको तर गोली, किला वा सिसामध्ये के हो भन्ने थाहा नभएको डाक्टरहरुले जनाएका छन् ।
घाइते प्रहरी जवान कमलको साथमा दुईजना चिकित्सकहरु पनि गएका अस्पतालले जनाएको छ ।
