- २०८१ बैशाख १३ बिहीबार
काठमाडौं । नेपाली काँग्रेसले चिकित्सा शिक्षा विधेयकको विरोधमा संसद बैठक अवरुद्ध गरेको छ ।
प्रतिनिधि सभाको आजको बैठक सुरु हुनासाथ काँग्रेसका सांसदहरुले आ-आफ्नो ठाउमा उठेर विरोध गरेका थिए । काँग्रेसका सांसद मीन विश्वकर्माले अध्यादेश विपरीत विधेयक आएको र आमरण अनसनरत डा. गोविन्द केसीको मागप्रति गम्भीर नभएको बताए । उनले सरकारले डा. केसीको मागप्रति गम्भीर नभएको भन्दै सार्वजनिक रुपमा सरकारले संसदको मजाक बनाएको थिए । विश्वकर्माले डा. केसीको मागलाई वार्ताको माध्यमबाट समाधान गर्न आग्रह गरे ।
काँग्रेस सांसद विरोधमा उभिरहेका बेला नेकपाका सांसद कृष्णभक्त पोखरेलले नियमापत्ति गरेका थिए । प्रतिस्थापन विधेयक ल्याउँदा अध्यादेशको हुबहु भएन भनेर अवरोध गरेको कांग्रेसले नियमित विधेयक ल्याउँदा अवरोध गर्दैनौं भनेको दाबी गर्दै नियमापत्ति गरेका थिए । पोखरेलले केही सांसद उभिदैंमा संसद अवरुद्ध भएको नमानिने बताएका थिए ।
लगतै नेकपाका अर्का सांसद खगराज अधिकारीले पनि चिकित्सा शिक्षा विधेयक नियमित प्रक्रियामा ल्याउँदा अवरोध नगर्ने सहमति उल्लंघन भएको दाबी गरेका थिए ।
सभामुखले पनि कांग्रेस सांसदहरुलाई सदनको कारबाही अघि बढाउन सहयोगको आग्रह गरेपनि काँग्रेस सांसदहरु उभिरहेपछि सभामुखले संसद बैठक आधा घन्टाका लागि स्थगित गरेका छन् ।
