- २०८१ बैशाख ८ शनिबार
काठमाडौं । राष्ट्रिय पुनर्निर्माण प्राधिकरणका प्रमुख कार्यकारी अधिकृत (सीईओ) युवराज भुसालले सरकारको पत्र बुझेका छन् ।
अघिल्लो सरकारका पालामा भएका सबै राजनीतिक नियुक्ति बदर गर्ने निर्णय सरकारले गरेपछि सो अनुसारको पत्र भुसालले आइतबार बुझेका हुन् ।
सरकारले दिएको पत्रमा निर्वाचन आचारसंहिता लागेपछि अघिल्लो सरकारले गरेका राजनीतिक नियुक्तिलाई सरकारको मन्त्रिपरिषदले असार २० गते गरेको निर्णय अनुसार पदमुक्त गरिएको उल्लेख गरिएको छ ।
सरकारले उल्लेख गरेको पत्रमा करिब ९ महिना प्राधिकरणलाई नेतृत्व दिएका भुसालको कामको बारेमा कुनै उल्लेख गरिएको छैन भने सरकारले 'धन्यवाद' दिन समेत कन्जुस्याई गरेको छ ।
प्रधानमन्त्री कार्यालयका सचिव बुद्धिबहादुर खड्काले हस्ताक्षर गरेको सो पत्रमा मिति असार २१ गते उल्लेख गरिएको भएपनि भुसाललाई शुक्रबार अबेर मात्र पत्र बारे जानकारी गराइएको थियो ।
पुर्व अर्थसचिव समेत रहेका भुसाललाई तत्कालिन देउवा नेतृत्वको सरकारले गत कात्तिक ६ गते प्राधिकरणको सीईओमा नियुक्त गरेको थियो ।
