काठमाडौँ । विश्वकपमा समुह ए बाट उरुग्वे पहिलो हुदै दोस्रो चरणमा पुगेको छ । समुह चरणको अन्तिम खेलमा उरुग्वेले आयोजक रसियालाई ३-० ले पराजित गर्दै समुह ए मा प्रथम भएको हो ।
उरुग्वेको जितमा लुइस स्वरेज र एडिन्सन कभानीले एक-एक गोल गरेका थिए भने एक गोल रसियाका डेनिस चेरिशेभले आत्मघाती गोल गरेका थिए ।
उरुग्वेले समुह चरणका ३ खेल जितेर ९ अंक सहित दोस्रो चरणमा प्रवेश गरेको हो । त्यस्तै रसियाले ३ खेलमा २ मा जित र एक हार सहित ६ अंक सहित समुहमा दोस्रो हुदै विश्वकपको दोस्रो चरणमा प्रवेश गरेको छ ।
यस समुहबाट यस अघि नै बाहिरिइसकेको साउदी अरेबियाले आफ्नो अन्तिम खेलमा इजिप्टलाई २-१ गोल अन्तरले पराजित गर्दै विश्वकपमा सान्त्वना जित हासिल गरेको छ ।
अब अन्तिम १६ को खेलमा उरुग्वेले पोर्चुगलको सामना गर्ने भएको छ भने रसियाले स्पेनको सामना गर्ने भएको छ । उरुग्वे र पोर्चुगलको खेल आगामी शनिबार राति ११:४५ बजे हुदै छ भने स्पेन र रसियाको खेल आगामी आइतबार ७:४५ मिनेटमा हुदै छ ।