- २०८१ बैशाख ६ बिहीबार
काठमाडौँ स्पेनिस क्लब रियल म्याड्रिडले स्पेनका राष्ट्रिय टिमका प्रशिक्षक जुलियन लोपेटेगीलाई क्लबको नयाँ प्रशिक्षकमा नियुक्त गरेको छ।
लोपेटेगीले विश्वकप पछि रियलको प्रशिक्षक पद सम्हाल्ने क्लबले जानकारी दिएको छ । रियलले उनीसँग तीन वर्षको सम्झौता गरेको जनाएको छ ।
लोपेटेगीले सन् २०१६ को जुलाईमा स्पेनको राष्ट्रिय टिमको जिम्मेवारी सम्हाल्नु अघि दुई सिजन पोर्टोको म्यानेजर बनेका थिए ।
पूर्वगोलरक्षक लोपेटेगीले रियल म्याड्रिड र बार्सिलोनाबाट पनि खेलिसकेका छन् । विभिन्न क्लबबाट ला लिगाका कुल १४९ खेल खेलेका ५१ बर्षिय लोपेटेगीले स्पेनको राष्ट्रिय टिमबाट १९९४ को विश्कप समेत खेलेका थिए ।
जिनेदिन जिदानले गत मेमा अचानक राजीनामा दिएपछि रियल नयाँ प्रशिक्षकको खोजीमा रहेको थियो । साढे दुई बर्षको छोटो अवधिमा जिदानले रियललाई लगातार तीन च्याम्पियन्स लिग र एक ला लिगाको उपाधि जिताएका थिए ।
