भरतपुरमा कृषि विकास बैंकको बैंकिङ अन्तर्क्रिया

काठमाडौं । कृषि विकास बैंकले चितवनको भरतपुरमा अन्तर्क्रिया कार्यक्रम सम्पन्न गरेको छ । बैंकले यही जेठ १३ गते भरतपुर गार्डेन रिसोर्ट प्रा.लि.मा बैंकको क्षेत्रीय कार्यालय वीरगञ्जले “स्थानीय तहमा कृषि विकास बैंक लि.” विषयक एकदिने अन्तर्क्रिया कार्यक्रम गरेको हो ।

कार्यक्रममा भरतपुर महानगरपालिकाका मेयर, उपमेयर, सो अन्तर्गतका २९ वटा वडाका अध्यक्षहरु, चितवनका रत्ननगर न. पा., खैरहनी न.पा., माडी न.पा., राप्ती न.पा. तथा कालिका न.पा.का मेयर, भरतपुर महानगरपालिकाका प्रमुख प्रशासकीय अधिकृत तथा अन्य पदाधिकारी, कृषि विकास बैंक चितवनका ८ वटा शाखा÷उपशाखा तथा तालीम केन्द्रका शाखा प्रबन्धकहरु तथा तालीम केन्द्र प्रमुख, चितवन उद्योग बाणिज्य संघका अध्यक्ष, खानेपानी व्यवस्थापन बोर्ड भरतपुरका प्रमुख कार्यकारी अधिकृत तथा पत्रकारहरु गरी करिव ९० जनाको सहभागिता रहेको थियो ।

सो कार्यक्रम भरतपुर महानगरपालिका प्रमुख रेनु दाहालले पानसमा बत्ती बाली उद्घाटन गरेकी थिइन् भने बैंकका प्रमुख कार्यकारी अधिकृत लिला प्रकाश सिटौलाले जनप्रतिनिधिहरुलाई खादा ओढाई सम्मान गरेका थिए । कार्यक्रमका सहभागीहरुलाई क्षेत्रीय कार्यालय वीरगञ्जका निर्देशक बाबुकाजी थापाले स्वागत गर्दै आगामी दिनमा भरतपुर महानगरपालिका, अन्य न.पा., स्थानीय तह तथा निकायहरुसँग कृषि विकास बैंक हातेमालो गरी आधुनिक बैंकिंग सेवा प्रदान गर्न चाहेको बताए ।

बजार तथा शाखा व्यवस्थापन विभागका विभागीय प्रमुख प्रेम कुमार श्रेष्ठले कृषि विकास बैंकद्धारा विगतमा नेपाली जनताको आर्थिक तथा सामाजिक विकासमा गरेको योगदान, बैंकले हाल ल्याएको नयाँ ÷नयाँ प्रोडक्ट तथा कार्यशैलीमा ल्याएको परिवर्तनका बारेमा जानकारी गराए । कार्यक्रममा सहभागीहरु बीच करिव आधा घण्टा खुला छलफल भई बैंकका बिषयमा विभिन्न गुनासा, राम्रा पक्ष र सुधार गर्नु पर्ने पक्षमा बिचारहरु आदान प्रदान गरिए ।

रत्नगर न.पा.का मेयर नारायण वन, कालिका न.पा.का मेयर खुम नारायण श्रेष्ठ (गोपी), माडी न.पा.का मेयर श्री ठाकुर प्रसाद ढकाल तथा राप्ती न.पा.का मेयर प्रभा बरालले कृषि विकास बैंकले नेपाली जनताको मन विश्वास जित्न सफल भएको, नयाँ पुस्तालाई अपेक्षित रुपमा आकर्षण गर्न अझ मेहनत गर्नु पर्ने र अन्य बैंकहरुको तुलनामा प्रतिष्पर्धी भई बजारमा आउनुपर्ने धारणा राखे ।

कार्यक्रमलाई सम्बोधन गर्दै भरतपुर महानगरपालिकाका मेयर दाहालले नेपाल सरकारको सबै स्थानीय तहमा बैंकिङ्ग सेवा पु¥याउने नीति रहेको र सो सन्दर्भमा कृषि विकास बैंकसँग मिलेर भरतपुर महानगरपालिकाका सामाजिक सुरक्षाका कार्यक्रम, विकासका कार्यक्रम लगायत अन्य सम्पूर्ण कार्यक्रम गर्न समेत ईच्छुक रहेको बताइन् । कार्यक्रममा बैंकका प्रमुख कार्यकारी अधिकृत सिटौलाले सम्पूर्ण निर्वाचित जनप्रतिनिधिहरुलाई निर्वाचित भएकोमा बधाई दिएका थिए ।

उनले बैंकले छिट्टै देशका ७ वटै प्रदेशमा कम्तीमा ४ वटाका दरले कुल २८ वटा ठूला कृषि परियोजना सञ्चालन गरी कृषि पेशालार्ई व्यवसायिक गर्न प्रयास गर्ने जानकारी गराउँदै यो बैंकलाई थप आधुनिक, प्रतिष्पर्धी र प्रविधी मैत्री बनाइने बताए । उक्त कार्यक्रममा क्षेत्रीय कार्यालय वीरगञ्जका शाखा प्रमुख रामचन्द्र अधिकारी, बैंकिङ्ग कार्यालय नारायणगढका शाखा प्रबन्धक राजेन्द्र पौडेल, शाखा अधिकृत तेज प्रसाद घिमिरे तथा का.स.  उमेश पौडेल समेतको उपस्थिति थियो ।