काठमाडौँ । सरकारको नीति तथा कार्यक्रममाथि प्रतिनिधिसभाको बैठकबाट सर्वसम्मतिले पारित भएको छ ।
आजको बैठकमा सभामुख कृष्णबहादुर महाराले सरकारको नीति तथा कार्यक्रमलाई निर्णयार्थ प्रस्तुत गरेका थिए । निर्णयार्थ प्रस्तुत गरेको नीति तथा कर्यक्रममा प्रमुख प्रतिपक्षि नेपाली काँग्रेससहित ने विपक्षी दलले विरोध नगरेकाले सर्वसम्मत पारित भएको हो ।
यसअघि आजको बैठकमा सरकारको नीति तथा कार्यक्रममाथि जेठ ९, १० र ११ गते लगातार भएको छलफलपछि प्रधानमन्त्री केपी शर्मा ओलीले छलफलका क्रममा उठेका प्रश्नको जवाफ दिएका थिए ।
सरकारले संघीय संसद्मा प्रस्तुत गरेको आव २०७५/७६ को नीति तथा कार्यक्रममाथि छ वटा संशोधनका सूचना दर्ता भएको थिए ।
प्रमुख प्रतिपक्ष दल नेपाली काँग्रेसका डा मीनेन्द्रप्रसाद रिजाललगायत १७ सांसदले प्रस्तुत गरिएको संशोधनमा राष्ट्रपतिबाट भएको नीति तथा कार्यक्रमको सम्बोधन विभिन्न ठाउँमा सभामुख र राष्ट्रियसभाका अध्यक्षलाई सम्बोधन गर्दा आदरार्थी शब्द प्रयोग नभएको उल्लेख गरिएकोमा निर्णयार्थ प्रस्तुत गर्दा असफल भएको थियो ।
संघीय समाजवादी फोरम नेपालका सुरेन्द्रकुमार यादव, रेनुका गुरुङ, प्रदीप यादव र राम सहायप्रसाद यादवले संशोधन प्रस्ताव दर्ता गरेका थिए ।
त्यस्तै राष्ट्रिय जनता पार्टी नेपालका सांसदद्वय अनिलकुमार झा र लक्ष्मणलाल कर्णले शहीदका परिवारको भरणपोषणको व्यवस्था गर्नु सरकारको दायित्व रहने भन्ने शब्द समावेश गर्न लगायतका विषयमा संशोधन प्रस्तुत गरेकोमा निर्णयार्थ प्रस्तुत गर्दा असफल भएको थियो ।
यसअघि राष्टपति विद्यादेवी भण्डारीले सरकारको नीति तथा कार्यक्रम यही जेठ ७ गते संघीय संसद्मा प्रस्तुत गरी सम्बोधन गरेकी थिइन ।
आजको बैठकमा सभामुख महराले आगामी जेठ १५ गते अपराह्न ४ बजे अर्थमन्त्रीले आर्थिक बर्ष २०७५ -७६ को बजेट दुवै सदनको संयुक्त बैठकमा प्रस्तुत हुने जानकारी गराएका थिए ।
संसदको अर्को बैठक आगामी जेठ १५ गते साँझ ६:३० बजे बस्ने छ ।