- २०८१ बैशाख ५ बुधबार
राजविराज । सप्तरी बेल्ही चपेना गाउँपालिका– १ मा ट्र्याक्टरको ठक्करबाट आज एक बालकको मृत्यु भएको छ ।
मृत्युहुनेमा स्थानीय जीतन यादवको ११ वर्षीय छोरा ब्रम्हदेव यादव रहेका छन ।
स १ त ५०८४ नं को ट्र्याक्टरको ठक्करबाट गम्भीर घाइते भएका यादवको नोबेल अस्पताल विराटनगरमा उपचारका क्रममा मृत्यु भएको जिल्ला प्रहरी कार्यालय सप्तरीले जनाएको छ ।
ट्याक्टर प्रहरीको नियन्त्रणमा छ भने चालक फरार रहेकाले उनको खोजी भइरहेको जिप्रकाले जनाएको छ ।
शहीद परिवारलाई गाउँपालिकामा जागिर
यसैगरी सप्तरीको रुपनी गाउँपालिकाले मधेश आन्दोलनका क्रममा शहीद भएका नागेश्वरकुमार यादवका परिवारलाई सामाजिक परिचालकका रुपमा नियुक्ति दिएका छन् ।
शहीद यादवकी पत्नी सुष्माकुमारी यादवलाई सामाजिक परिचालकाको रुपमा नियुक्त गरिएको गाउँपालिकाका अध्यक्ष हरेराम यादवले जानकारी दिए ।
प्रमुख प्रशासकीय अधिकृत रामसुन्दर थापा गाउँपालिकाका अध्यक्ष हरेराम यादव र उपाध्यक्ष बेचनीदेवी सरदारको संयुक्त हस्ताक्षरित नियुक्ति पत्र सुष्मालाई हस्तान्तरण गरेको गाउँपालिका अध्यक्ष यादवले बताए ।
मधेश आन्दोलनका क्रममा शहीद भएका परिवारलाई गाउँपालिकास्तरमा जागिर दिइएको सप्तरीमा सम्भवत यो पहिलो भएको दाबी गरिएको छ ।
विसं २०७२ मंसिर ५ र ६ गते मधेशी मोर्चा सप्तरीले आयोजना गरेको ‘चालु राजमार्ग भरु राजमार्ग’ कार्यक्रमका बेला रुपनीमा प्रहरीले चलाएको गोली लागेर जमुनी मधेपुरा– ९ का २७ वर्षीय नागेश्वर यादवको घटनास्थलमै मृत्यु भएको थियो ।
