काठमाडौँ । इङलिश प्रिमियर लिग अन्तर्गत यस सिजनमा रेलेगेसनमा पर्ने टिमको टुंगो लागेको छ ।
गएराती भएको खेलमा चेल्सीसँग १-१ गोलको बराबरी खेलेर रेलिगेसन जोनबाट हडर्सफिल्ड बाहिर आएपछि स्वान्सी सिटी रेलिगेसनमा पर्ने तेस्रो टिम बनेको हो ।
यस सिजनमा स्वान्सीसँगै वेस्टब्रोमविच र स्टोक सिटी रेलिगेसनमा परेका छन् । लिगमा ३७ खेल खेलेको स्वान्सी सिटीको ३३ अंक छ भने वेस्टब्रोमविचको ३७ खेलमा ३१ र स्टोकको ३७ खेलमा ३० अंक रहेको छ ।
प्रिमियर लिगमा यस सिजनमा गत बर्ष लिगमा प्रमोट भएका तिनवटै क्लब रेलिगेसनबाट जोगिएका छन् । यस सिजनमा न्युक्यासल युनाइटेड, ब्राइटन र हडर्सफिल्ड २०१६-१७ को च्याम्पियनसिपमा प्रमोट भएर प्रिमियर लिगमा आएका थिए भने उनीहरु तिनै क्लबले नै यस सिजनमा प्रिमियर लिगमा आफ्नो स्थान सुरक्षित गरेका छन् ।
प्रमोट भएका तिनै क्लबले आफ्नो अर्को सिजन सुरक्षित गरेको प्रिमियर लिगको इतिहासमा यो तेस्रो पटक हो । यसअघि सन २००१-०२ र २०११-१२ मा पनि प्रमोट भएका तिनै क्लबले अर्को सिजनमा आफुलाई सुरक्षित गर्न सफल भएका थिए ।