- २०८१ बैशाख ६ बिहीबार
काठमाडौँ । यस सिजनको च्याम्पियन्स लिगको सेमिफाइनलको ड्र भएको छ ।
शुक्रबार भएको ड्र अनुसार सेमिफाइनलमा डिफेन्डिङ च्याम्पियन रियल म्याड्रिड जर्मनी क्लब बायर्न म्युनिखसँग खेल्ने भएको छ । त्यस्तै इटालियन क्लब एस रोमा भने लिभरपुलसँग सेमिफाइनल खेल्ने भएको छ ।
रियल म्याड्रिडले युभेन्टसविरुद्ध समग्रमा ४-३ गोल अन्तरले नतिजा आफ्नो पक्षमा पार्दै सेमिफाइनलको यात्रा तय गर्यो भने बायर्न म्युनिखले सेभिल्लासँग समग्रमा २-१ को नतिजा निकाल्दै सेमिफाइनलमा पुगेको थियो ।
यस अघि बुधबार राति रोमाले बार्सिलोनाको पहिलो लिगको अग्रता उल्टाउदै समग्रमा ४-४ को नतिजा बनाउदा अवे गोलको आधारमा सेमिफाइनलको यात्रा तय गर्यो । त्यस्तै बुधबारनै लिभरपुलले सिटीलाई २-१ ले पराजित गर्दै समग्रमा ५-१ को नतिजासहित समिफाइनलको यात्रा तय गरेको थियो ।
सेमिफाइनलको ड्र ओपन ड्र भएको युईएफएले जनाएको छ । साथै ड्र गर्दा पहिलो नाम आउने टिमले सेमिफाइनलको पहिलो लिग आफ्नो घरेलु मैदानमा खेल्ने पनि युईएफएले जनाएको छ ।
सेमिफाइनल खेलको पहिलो लिग अप्रिल २४ र २५ मा हुने छ भने दोस्रो लिग मे १ र २ मा हुने छ । प्रतियोगिताको फाइनल मे २६ मा युक्रेनमा हुने छ ।
