- २०८१ बैशाख १२ बुधबार
काठमाडौं । पुनर्निर्माणमा क्रियाशील तीन लाखभन्दा बढी लाभग्राही दोस्रो किस्ताका लागि योग्य भएका छन् ।
शहरी विकास मन्त्रालय अन्तर्गतको केन्द्रीय आयोजना कार्यान्वयन इकाइको आइतबारसम्मको तथ्यांक अनुसार दोस्रो किस्ताका लागि प्रमाणीकरण हुने लाभग्राहीको संख्या ३ लाख ३ हजार ५ सय ५५ पुगेको छ ।
प्रमाणकीकरण भएका लाभग्राहीले आफ्नो आवश्यकता अनुसार बैंकबाट घर पुनर्निर्माणका लागि डेढ लाख रुपैया लिन सक्छन् ।
पछिल्लो समय निजी आवास पुनर्निर्माणले गति लिएसँगै दोस्रो किस्ताका लागि दाबी गर्ने लाभग्राहीको संख्या दिन प्रति दिन बढिरहेको छ । आइतबारकै तथ्यांकअनुसार ३ लाख १४ हजार १ सय २४ जना लाभग्राहीले दोस्रो किस्ताका लागि निवदेन दिएका छन् ।
पहिलो किस्ता लिएर भूकम्प प्रतिरोधी मापदण्डअनुसार घरको जग राखेका लाभग्राहीले निवेदन दिएपछि प्राविधिकले दोस्रो किस्ताका लागि प्रमाणीकरण गर्छन् ।
दोस्रो किस्ताका लागि प्रमाणीकरण भएका लाभग्राही सिन्धुपाल्चोकका सबैभन्दा धेरै छन् । त्यहाँका ५१ हजार ९ जना भूकम्प प्रभावित लाभग्राहीले अब दोस्रो किस्ता पाउनेछन् ।
त्यसैगरी, नुवाकोटका ४१ हजार ७ सय ९४, गोरखाको ३६ हजार ८ सय ६५, दोलखाका ३४ हजार २८ जना, धादिङका ३१ हजार ९ सय ३७ जना, काभ्रेपाल्चोकका २३ हजार ९ सय ४५ लाभग्राहीले पनि दोस्रो किस्ता पाउनेछन् ।
भूकम्प कम प्रभावित जिल्लाका लाभग्राही पनि दोस्रो किस्ताका लागि योग्य हुन थालेका छन् । आइतबारसम्म लमजुङका ५ सय ९२ र चितवनका १ सय ६५ लाभग्राहीको नाम दोस्रो किस्ताका लागि प्रमाणीकरण भएका छन् ।
राष्ट्रिय पुनर्निर्माण प्राधिकरणका प्रवक्ता यमलाल भूसालले अनुदान सम्झौता भएका ६ लाख ९७ हजार ६ सय ३५ लाभग्राहीमध्ये ४३.५१ प्रतिशत लाभग्राहीले दोस्रो किस्ता पाउनु उल्लेखनीय प्रगति भएको मान्न सकिने बताए ।
दोस्रो किस्ताका लागि प्रमाणीकरण भएका लाभग्राहीको संख्या जस्तै भूकम्प अति प्रभावित १४ जिल्लामा निर्माणधीन घरको संख्या ३ लाख ५८ हजार ६ सय ३७ छ भने निर्माण सम्पन्न भएका घरको संख्या १ लाख १० हजार ४ सय ७२ पुगेको छ ।
प्राधिकरणको सूचना प्रणालीमा दर्ता भएको तथ्यांक अनुसार सिन्धुपाल्चोकमा सबैभन्दा धेरै ५७ हजार ३३ घर पुनर्निर्माण भइरहेका छन् ।
यो गतिलाई तीव्रता दिंदै मनसुन शुरु हुनु भन्दा अगावै थप घरहरुको निर्माणमा बढोत्तरी कायम गर्ने गरी प्राधिकरणले आवश्यक तयारी गरिरहेको प्रवक्ता भूसालले बताए ।
भूकम्प प्रभावित लाभग्राहीले दोस्रो किस्ताबापत १ लाख ५० हजार पाउँछन् भने तेस्रो किस्तामा १ लाख रुपैया पाउँछन् ।
काठमाण्डौ उपत्यकामा निजी आवास पुनर्निर्माणलाई गति दिन सरोकारवालालाई सिइओ भूसालको निर्देशन
काठमाण्डौ उपत्यकामा निजी आवास पुनर्निर्माणको गति सुस्त भइरहेका बेला त्यसलाई तिव्रता दिन राष्ट्रिय पुनर्निर्माण प्राधिकरणले माहतहतका निकायलाई निर्देशन दिएको छ ।
प्राधिकरणका प्रमुख कार्याकारी अधिकृत युवराज भूसालले आइतवार शहरी बिकास मन्त्रालय र स्थानीय बिकास मन्त्रालय अन्र्तगतका केन्द्रीय आयोजना कार्यान्वयन इर्काइका प्रमुखसहित काठमाण्डौ ललितपुर र भक्तपुरका भवन कार्यालय, प्राधिकरण लगायत निकायका प्रमुखलाई बोलाएर काठमाण्डौ उपत्यकामा निजी आवास पुनर्निर्माणको गतिलाई तिव्रता दिने गरी काम गर्न निर्देशन दिनुभयो ।
उहाँले पुनर्निर्माणमा आइपर्ने समस्यालाई फुकाउन प्राधिकरण तयार रहेको भन्दै नतिजामूखी भएर काम गर्न कर्मचारीहरुलाई निर्देशन दिनुभयो ।
सो अवसरमा सहभागीहरुले सहुलियत ऋण प्रवाहमा भएको ढिलाई र जग्गासम्बन्धी समस्याका कारण अधिकांसले घर बनाउन नसकेको जानकारी गराएका थिए ।
बैठकले सहुलियत ऋण र अनुदान बितरणमा बैंकहरुले दिएको हैरानी र समस्यालाई सम्बोधन गर्न राष्ट्र बैंकको ध्यानाकर्षण गराउने निर्णय गरेको छ । यस्तै पुनर्निर्माण लाभग्राहीबाट प्रवलीकरण लाभग्राहीमा सर्न चाहनेहरुलाई आवश्यक जानकारी दिन प्रचार प्रसार कार्यक्रम अघि बढाउने निर्णय गरेको छ । यस्तै संयुक्त पुर्जा भएकालाई बहु स्वामित्व र बहुतले भवन बनाउन प्रोत्साहन गर्न आवश्यक प्रचारप्रसारलाई व्यापक बनाउने निर्णय समेत बैठकले गरेको छ ।
