- २०८१ बैशाख १४ शुक्रबार
काठमाडौँ । बाम गठबन्धनबाट एमालेले सभामुख पदमा तेह्रथुमकी समानुपातिक सांसद डा. शिवमाया तुम्वाहाम्फेलाई उम्मेदवार बनाएको छ ।
संघीय संसदको सभामुख वा उपसभामुखमध्ये एकजना महिला हुनुपर्ने सवैधानिक व्यवस्था अनुसार दुवै दलले उपसभामुखमा महिला उम्मेदवार उठाएका छन् ।
नेपाली कांग्रेसले समानुपातिक सांसद पुष्पा भुषाललाई उपसभामुखको उम्मेदवार बनाएको छ ।
दुवैले आज संसद भवन नयाँ बानेश्वरमा उम्मेद्वारी दर्ता गरेका छन् ।
संघीय संसद् सचिवालयले भोलि चैत २ गते दिउँसो १ बजे उपसभामुखको निर्वाचनका लागि तय गरेको प्रवक्ता डा भरतराज गौतमले जानकारी दिएका छन् । उपसभामुखको निर्वाचनका लागि आज बिहान ११ देखि २ बजेसम्म उम्मेदवारी मनोनयन दर्ताको समय निर्धारण गरिएको थियो ।
प्रतिनिधिसभाका सभामुखको निर्वाचन गत फागुन २६ गते सम्पन्न भएको थियो । सभामुखमा नेकपा (माओवादी केन्द्र)का नेता कृष्णबहादुर महरा निर्विरोध निर्वाचित भइसकेका छन् ।
संविधानको धारा ९१ मा प्रतिनिधिसभाको पहिलो बैठक प्रारम्भ भएको मितिले १५ दिनभित्र सभामुख र उपसभामुखको निर्वाचन गरिसक्नुपर्ने व्यवस्था छ । प्रतिनिधिसभाको पहिलो बैठक गत फागुन २१ गते बसेको थियो ।
