- २०८१ बैशाख १२ बुधबार
काठमाडौँ । नेकपा एमालेका उपाध्यक्ष वामदेव गौतमले आफूले जनताको बहुदलीय जनवाद जबज लाई छाड्न नसक्ने बताएका छन् ।
शहीद यदुकुमार गौतमको १९औँ स्मृतिसभालाई सम्बोधन गर्दै उनले जबज संसारकै उत्कृष्ट विचारधारा भएको जिकिर गरे । ‘नेकपा माओवादी केन्द्रसँग एकता भए पनि म जबज छाड्न सक्दिन,’ उनले भने ।
उनले अहिलेसम्म माओवादी केन्द्रसँगको एकताको आधार नै जबज रहेको स्पष्ट गरे । उनले शहीद गौतमले नेपालको कम्युनिष्ट आन्दोलनमा पुर्याएको योगदानलाई भुल्न नसकिने बताउँदै गौतमको हत्या गरेर तत्कालीन माओवादीले गल्ती गरेको आरोप लगाए ।
यदुको विसं २०५५ फागुन २१ गते रुकुममा तत्कालीन माओवादीबाट हत्या गरिएको थियो । त्यतिबेला उनी एमाले जिल्ला सचिव रहेका थिए ।
कार्यक्रममा माओवादी केन्द्रका नेता जनार्दन शर्माले गौतमको हत्या पार्टीको निर्देशनमा नभई स्थानीयस्तरबाट भएको बताउँदै यदुको हत्यामा पार्टीले गल्ती स्वीकार गरिसकेको बताए ।
कार्यक्रममा यदुकी श्रीमती तीर्थाले पतिको हत्या के कारण भएको हो भन्ने अहिलेसम्म थाहा नपाएको बताउँदै अहिले दुई पार्टी एक हुन थालेकामा आफूलाई खुशी लागेको छ भने ।
