- २०८१ बैशाख १२ बुधबार
काठमाडौं । नेकपा एमालले आफ्नो पार्टीबाट सरकारमा पठाउने मन्त्री छान्ने जिम्मेवारी प्रधानमन्त्री तथा पार्टी अध्यक्ष केपी शर्मा ओलीलाई दिएको छ ।
आज प्रधानमन्त्री निवास बालुवाटारमा बसेको एमाले स्थायी समितिको बैठकले मन्त्री छान्ने जिम्मेवारी अध्यक्ष ओलीलाई प्रदान गरेको एमाले नेता योगेश भट्टराईले जानकारी दिएका छन् ।
बैठकमा प्रधानमन्त्री ओलीले संघीय समाजवादी र राष्ट्रिय जनता पार्टी(राजपा)सँगको छलफल टुंगो लागेपछि मात्र सरकार विस्तार गर्ने सोच बनाएको बताइएको छ ।
माओवादी, संघीय समाजवादी फोरम र राजपासँग ओलीले छलफल गर्ने उनले बताए । माओवादी बाहेक पनि मधेशवादी दललाई समेत सामेल गराउने गरी पार्टी अध्यक्ष तथा प्रधानमन्त्रीले फोरम र राजपासँग परामर्श गर्ने र मन्त्रिपरिषदलाई पूर्णता दिने जिम्मा प्रधानमन्त्रीलाइ नै दिएको भट्टराईले जानकारी दिएका छन् ।
बैठकले दुई दलबीच भएको सहमतिका प्रारम्भिक आधारलाई अनुमोदन गरेको छ।
पार्टी एकताको नजिक रहेकोले गाउँ तथा जिल्ला कमिटिमा हुन लागेका सम्मेलन तथा अधिवेशन अहिलेलाई स्थगित गर्ने बैठकले निर्णय गरेको छ।
