- २०८१ बैशाख १३ बिहीबार
काठमाडौँ । राष्ट्रपति विद्यादेवी भण्डारीले नेपालीको महान् पर्व ग्याल्बो ल्होसारका अवसरमा स्वदेश तथा विदेशमा रहेका सम्पूर्ण शेर्पा समुदायको सुख, शान्ति एवम् समृद्धिको कामना व्यक्त गरेकी छन् ।
राष्ट्रपति भण्डारीले शुक्रबार जारी गरेको सन्देशमा सिंगो नेपाली संस्कृतिभित्रको एक महत्वपूर्ण पर्वका रुपमा रहेको ल्होसारले सबै नेपालीमा उत्साह एवम् उमङ्ग बढाउँदै नेपालीबीचको एकता, सद्भाव एवम् मित्रता कायम राख्न प्रेरणा प्रदान गर्न सकोस् भन्ने कामना पनि गरेकी छन् ।
शेर्पा समुदायले मनाउने चाडपर्व र साँस्कृतिक परम्पराको बेग्लै महत्व रहेको बताउँदै उनले मुलुकमा मनाइने यस्ता चाडपर्व र संस्कृतिको संरक्षण तथा सम्वद्र्धनबाट विश्वसामु नेपाल र नेपालीको पहिचान सदा कायम राख्न सकिने भएकाले यसतर्फ सबैको ध्यान पुग्न आवश्यक भएको सन्देशमा व्यक्त गरेकी हुन् ।
सद्भाव अभिवृद्धि हुने उपराष्ट्रपतिको विश्वास
उपराष्ट्रपति नन्दबहादुर पुनले शेर्पा समुदायको महान् चार्ड ग्याल्बो ल्होछारका अवसरमा स्वदेश तथा विदेशमा रहेका सम्पूर्ण शेर्पा दिदीबहिनी तथा दाजुभाइलाई सुख, शान्ति, समृद्धि, सुस्वास्थ्य एवं उत्तरोत्तर प्रगतिको कामना गरेका छन् ।
आज शुभकामना सन्देश दिँदै उनले यस पर्वका माध्यमबाट नेपालीको आपसी सद्भाव, सहिष्णुता, भाइचारा र एकता अभिवृद्धि हुँदै जाने विश्वास व्यक्त गरेका हुन् ।
