- २०८१ बैशाख ६ बिहीबार
हेटौँडा । प्रदेश नं ३ नं प्रदेशका नवनियुक्त मुख्यमन्त्री डोरमणि पौडेलले आज अपराह्न मुख्यमन्त्री तथा मन्त्रिपरिषद्को कार्यालयमा पदबहाली गरेका छन् ।
पदबहालीपछि आयोजित समारोहमा मुख्यमन्त्री पौडेलले प्रदेश नं ३ को सन्तुलित विकासका लागि सीमित स्रोत साधन परिचालन गरी १३ वटा जिल्लामा नमूना शहर बनाउनु आफ्नो प्राथमिकता रहेको बताए । उनले प्रदेश सरकारको काम अगाडि बढाउन आवश्यक कानून निर्माण तथा परिमार्जन गर्ने बताए ।
मुख्यमन्त्री पौडेलले राष्ट्रसेवकले ऐन कानूनको परिधिभित्र रहेर जनमुखी सेवा प्रवाह गर्न र आर्थिक अनुशासन कायम राख्न आग्रह गरे ।
उनले हेटौँडा उपमहानगरपालिका–११ स्थित शहीद स्मारकमा गई आजै शहीदप्रति श्रद्धाञ्जलि अर्पण गरे । यसअघि मुख्यमन्त्रीमा आइतबार नियुक्त भएका पौडेलले सोमबार बिहान शपथग्रहण गरेका थिए । उनले प्रदेशको अस्थायी केन्द्र मकवानपुर जिल्लाको हेटौंडामा प्रदेशप्रमुख अनुराधा कोइरालासमक्ष शपथग्रहण गरेका हुन् ।
नेपालको संविधानको धारा १६८ को उपधारा १ बमोजिम मुख्यमन्त्री पौडेलले प्रदेश प्रमुखबाट शपथ लिए । उनलाई एमाले प्रदेश ३ को संसदीय दलको कार्यालयले सिफारिस गरेको थियो ।
मुख्यमन्त्रीको शपथका लागि ३ नं. प्रदेशका सभामुख सानु श्रेष्ठ, उपसभामुख राधिका तामांग, विपक्षी दल कांग्रेसका नेता इन्द्र बानियाँ, माओवादी प्रदेश संसदीय दलका नेता शालिकराम जमकट्टेललगायत सरकारी कर्मचारी, मकवानपुरबाट निर्वाचित प्रतिनिधिसभा सदस्यहरु, प्रदेश सांसद्हरुको उपस्थिति थियो ।
उनी गत शुक्रबार एमाले प्रदेशसभा संसदीय दलको नेतामा निर्वाचित भएका थिए । पौडेल र अष्टलक्ष्मी शाक्यबीच एमाले प्रदेशसभा संसदीय दलको नेता चयनका लागि भएको निर्वाचनमा नेत्री शाक्यलाई १० मतले पराजित गरेका थिए । संसदीय दलको नेता चुनिएका उनले ३४ र शाक्यले २४ मत पाएका थिए ।
पौडेल मकवानपुर १ खबाट प्रदेशसभा सदस्यमा निर्वाचित भएका थिए भनी उनी ०५४ को स्थानीय निकाय निर्वाचनमा हेटौंडा नगरपालिकाको मेयरमा निर्वाचित भएका थिए । उनी एमाले अध्यक्ष केपी ओली निकटस्थ मानिन्छन् ।
